- Шумо, ки бо эҷод ва меҳнати ҳамарӯза одат кардаед, ин истироҳати дарозмуддатро чӣ гуна таҳаммул карда истодаед?
-  Бо карантин суҳбат карда нишастаем, гӯям, дурӯғ мешавад. Барои ман ҳамчун як хонуми тоҷик пухтупаз, дӯхтану буридан, рӯбучин ва дигар корҳои  хона гоҳо аз кори театр ҳам вазнинтар аст. Аввалин бор имкон пайдо кардам, ки дар оромӣ китобҳои дер боз ҷамъовардаамро бихонам. Ҳоло тамоми фикру зикрам ба “Бибиҳо” банд аст. Охир, “Бибиҳо” 15-сола мешавад.
- “Бибиҳо” ором намегузорад гӯед?
- Бале, имсол тифли ормонҳоям ансамбли “Бибиҳо” ҷашн дорад. Ҳамчунин, бо машварати роҳбарияти раёсати фарҳанги вилояти Суғд бахшида ба 700 - солагии Камоли Хуҷандӣ пайи таҳияи силсилаи барномаҳо ҳастем. Хулоса, ба қавли Мавлоно “Ман он лаҳза биосоям, ки як лаҳза наосоям!”.
- Пас, маълум мешавад, ки дар бораи даҳшати коронавирус вақти фикр кардан надоштед...
- Не, коронавирус ба кишвари мо омада иштибоҳ кард, зеро мо худ аз насли тоҷдоронем, яъне аз Тоҷикистонем ва ба мо дигар корона даркор нест.  Ҳоло мебинем, ин вирус дар кӯтоҳтарин фурсат сарзамини моро тарк хоҳад кард (дар ин ҳарфҳои муаллима ҳамон ҷасорати ба Гурдофарид хос (аз филми машҳури “Рустам ва Суҳроб”)  эҳсос мешуд.
- Байни карантин ва рухсатии меҳнатӣ чӣ муштаракоту фарқият мебинед?
- Рухсатии охирин кай буд, дар ёдам нест . Зеро фориғ аз кори театр дар сабти кино будам. Бекорӣ маро бемор мекунад ва ростӣ карантинро фурсати хуб барои анҷоми корҳои солҳо қафомонда дарёфтам.
Мо аз ин суҳбати кӯтоҳ бо ҳунарманди номвар дарк кардем, ки барои фарде, ки ба ҳунар ва кору фаъолияташ арҷ мегузорад, карантин вуҷуд надорад.
 
Руқия ҚУРБОН, коромӯзи “Ҷумҳурият”