маориф
МАОРИФ. ЯК ҲАМОИШИ МУҲИМ
Таҳти раёсати муовини Сарвазири мамлакат Ширин Исматуллозода дар Вазорати маориф ва илм ҷаласаи Комиссияи ҷумҳуриявӣ оид ба интихоб ва тайёр намудани кадрҳо дар муассисаҳои таҳсилоти олӣ ва илмии давлатҳои хориҷӣ баргузор гардид. Дар кори он намояндагони Дастгоҳи иҷроияи Президенти Ҷумҳурии Тоҷикистон ва роҳбарони як қатор вазорату идораҳои дахлдори кишвар ширкат намуданд.
Чуноне ки ба «Ҷумҳурият» аз маркази матбуоти Вазорати маориф ва илм иттилоъ доданд, дар ҷаласа вобаста ба вазъи раванди қабули довталабон ба муассисаҳои таҳсилоти олӣ ва илмии давлатҳои хориҷӣ аз ҳисоби бурсияҳои давлатҳои хориҷӣ, маблағҳои буҷетӣ, Стипендияи байналмилалии Президенти Ҷумҳурии Тоҷикистон «Дурахшандагон» ва густариши ҳамкориҳо бо дигар давлатҳо гузориши директори Маркази барномаҳои байналмилалӣ Исматулло Шодиён шунида шуд. Маълум гардид, ки дар соли хониши 2020 - 2021 ҷиҳати таҳсил дар муассисаҳои таҳсилоти олии касбии хориҷи кишвар аз ҷониби Федератсияи Россия, ҷумҳуриҳои Озарбойҷон, Венгрия, Руминия, Беларус, Қазоқистон, Украина, Туркия ва Австрия барои шаҳрвандони Тоҷикистон бурсияҳои таҳсилӣ ҷудо гардидааст.
Ҳамчунин, гузоришҳои муовини якуми вазири маориф ва илм Муҳаммаддовуд Саломиён вобаста ба баргардондани маблағҳои буҷетӣ аз ҷониби хатмкардагони муассисаҳои таҳсилоти олие, ки ба ҷои кор ҳозир нашуданд ва сардори раёсати муносибатҳои байналмилалии вазорат Илҳом Камолзода гузориш оид ба масъалаи густариш додани муносибатҳои байни донишҷӯёни тоҷик, ки дар хориҷи кишвар таҳсил менамоянд ва ҳамкории густурдаи онҳо бо намояндагиҳои дипломативу консулии Ҷумҳурии Тоҷикистон шунида шуд.
Зимни баррасии масъалаҳо роҳбарони як қатор вазорату идораҳо, ба музокира баромада, фикру андеша ва пешниҳодоти худро иброз доштанд. Вобаста ба таҷдиди назар намудани тартиби қабули донишҷӯён ба муассисаҳои таҳсилоти олӣ ва илмии хориҷи кишвар, назорати раванди таҳсили донишҷӯёни тоҷик дар муассисаҳои таълимии кишварҳои хориҷӣ, баъд аз таҳсил баргардондан ва бо ҷои кор таъмин намудани донишҷӯёне, ки дар асоси бурсияҳо таҳсил намудаанд ибрози назар карда шуд.
М. ТАБАРӢ, “Ҷумҳурият”
Баёни ақида (0) Санаи нашр: 02.07.2020 №: 121 Мутолиа карданд: 2060
