иқтисод
ДАНҒАРА. АВЛАВИЯТ БА ТАЪСИСИ ҶОЙҲОИ НАВИ КОР
Фаро гирифтани аҳолӣ бо шуғл яке аз самтҳои афзалиятноки сиёсати Ҳукумати Ҷумҳурии Тоҷикистон ба ҳисоб меравад. Натиҷаи татбиқи барномаҳои давлатӣ дар ин самт нишон медиҳад, ки вазъи иҷтимоии табақаҳои ниёзманди аҳолӣ сол ба сол беҳтар ва имконият дар самти ҳифзи иҷтимоии аҳолӣ бештар мегардад.
Бино ба иттилои Салимҷон Нуралиев, сардори шуъбаи Агентии меҳнат ва шуғли аҳолӣ дар ноҳияи Данғара, бо дастгирии мақомоти иҷроияи ҳокимияти давлатии ноҳия кормандони ҷамоатҳои шаҳраку деҳот ва корфармоён дар таъсис додани ҷойҳои нави корӣ ба натиҷаҳои назаррас ноил шудаанд. Дар ин давра ба шуъбаи Агентии меҳнат ва шуғли аҳолӣ 573 нафар шаҳрвандони корҷӯ муроҷиат карда, 348 нафари онҳо бо кор таъмин гардиданд. 131 нафар ба омӯзиши ҳунар (60 нафар ба дӯзандагӣ, 27 нафар ба омӯзиши компютер, 14 нафар ба гулдӯзӣ, 15 нафар ба қуроқдӯзӣ ва 15 нафар ба ороиши мӯй) фаро гирифта шуданд.
Ҳамчунин, аз ҳисоби духтарон ва модарони серфарзанд давоми 6 моҳи соли равон 10 нафар дар асоси роҳхат дар беморхонаи марказӣ бо ҷойи кор таъмин карда шуд.
Дар доираи нақшаи чорабиниҳои раёсати Агентии меҳнат ва шуғли аҳолӣ дар вилояти Хатлон, дар ҳудуди ноҳия дар ин давра бо иштироки намояндагони мақомоти иҷроияи ҳокимияти давлатии ноҳия, ташкилоту корхонаҳо, ҷамоатҳои шаҳраку деҳот ва корфармоён 4 маротиба ярмаркаҳои ҷойҳои холии кор ва вазифаҳои озод гузаронда шуда, дар ин ярмаркаҳо 66 нафар бо ҷои кори доимӣ таъмин шуд. Дар зарфи 6 моҳи соли 2020 ба 107 нафар ҷавононе, ки хизматро дар сафҳои Қувваҳои Мусаллаҳи Тоҷикистон адо кардаанд, ба маблағи 32 ҳазору 700 сомонӣ кумакпулӣ пардохт гардидааст.
Холназар КАСИРОВ, «Ҷумҳурият»
Баёни ақида (0) Санаи нашр: 22.07.2020 №: 136 Мутолиа карданд: 936
