фарҳанг
"ШОМЕ ДАР КИТОБХОНА"
Бо мақсади иҷрои Амри Президенти Ҷумҳурии Тоҷикистон муҳтарам Эмомалӣ Раҳмон дар бораи Озмуни ҷумҳуриявии «Фурӯғи субҳи доноӣ китоб аст», Китобхонаи миллии Тоҷикистон дар якҷоягӣ бо раёсати кор бо ҷавонон ва варзиши шаҳри Душанбе маҳфили адибони ҷавони навқаламу эҷодкорро таъсис додааст, ки ҳар ҳафта рӯзи сешанбе таҳти унвони «Шоме дар китобхона» бо ҷалби ҷавонону наврасони соҳибистеъдод, баргузор мешавад.
Мақсад аз ташкили чунин озмунҳо баланд бардоштани завқи китобхонӣ, тақвияти неруи зеҳнӣ, дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ, такмили захираи луғавӣ ва тақвияти ҷаҳони маънавӣ миёни аҳолии мамлакат мебошад.
- Озмун аз чор давр ва панҷ номинатсия иборат буда, аз моҳи феврал то моҳи декабри соли 2020 идома меёбад. Даври якум моҳи апрел дар муассисаҳои таълимӣ, ташкилоту муассисаҳои деҳот ва шаҳрак, даври дуюм моҳи июн дар маркази ноҳия ва шаҳрҳо (ба истиснои шаҳри Душанбе), даври сеюм нимаи дуюми моҳи сентябр дар маркази вилоятҳо ва шаҳри Душанбе, даври чорум – ҷумҳуриявӣ барои ғолибони даври сеюм то 10 декабр, аз рӯи номинатсияи адабиёти классикӣ, адабиёти муосир, адабиёти бачагона, адабиёти ҷаҳон ва шоирӣ дар Китобхонаи миллии Тоҷикистон гузаронда мешавад. Бо таваҷҷуҳ ба пурзӯр намудани тадбирҳо ҷиҳати пешгирӣ аз паҳншавии бемории коронавирус дар китобхона масофаи иҷтимоӣ риоя гардида, иштирокдорони озмунро бо маводи зиддиуфунӣ безарар гардонда, аз санҷиш мегузаронанд, - гуфт Фариддун Азизов муовини сардори шуъбаи тарғиб ва баргузории чорабиниҳои фарҳангии Китобхонаи миллии Тоҷикистон.
Гулнисои САЪДОНШО,
«Ҷумҳурият»
Баёни ақида (0) Санаи нашр: 24.07.2020 №: 138 Мутолиа карданд: 617
