иқтисод
КИШОВАРЗӢ. КАРТОШКАПАРВАРОН УСУЛҲОИ ПЕШҚАДАМРО МЕОМӮЗАНД
Созмони озуқаворӣ ва кишоварзии Созмони Милали Муттаҳид (ФАО) бо дастгирии Вазорати кишоварзӣ дар доираи лоиҳаи «Тақвият додани муассисаҳо ва тавоноии Вазорати кишоварзӣ ва Хадамоти назорати давлатии байторӣ», ки аз ҷониби Иттиҳоди Аврупо маблағгузорӣ мешавад, оид ба ҷорӣ намудани технологияҳои пешқадами парвариши картошка, усулҳои истифодаи нуриҳо ва таҳияи системаҳои обёрӣ бо картошкапарварон курсҳои омӯзишию вохӯриҳо ташкил намуданд.
Гурӯҳи мақсадноки амалисози ин чорабиниҳо аъзои кооперативҳои кишоварзии ноҳияҳои Шаҳристон ва Нуробод мебошанд, ки моҳи май аз тақсимоти 80 тонна тухмии баландҳосил барои таъсиси фондҳои тухмии картошка ва беҳгардонии амнияти озуқавории аҳолии деҳот бо мақсади пешгирӣ аз таъсири иҷтимоию иқтисодии бемории сироятии COVID-19 баҳра гирифта буданд.
Ҳадафи машварату вохӯриҳо шинос намудани кишоварзон бо усулҳои пешқадами парвариши картошка, тарзи обёрӣ ва додани нуриҳои органикӣ, инчунин, баланд бардоштани ҳосилнокӣ ва парвариши маҳсулоти хушсифат арзёбӣ мешавад.
Алҳол дар қатори тағйирёбии иқлим ва офатҳои табиӣ пандемияи COVID-19 низ ба таъмини амнияти озуқаворӣ ва рушди иқтисодиёти ҷаҳон, аз ҷумла Тоҷикистон, таъсири манфӣ мерасонад.
Картошка дар Тоҷикистон маҳсулоти муҳими кишоварзӣ ба шумор меравад ва онро «нони дуюм» низ меноманд, аз ин рӯ, мустаҳкам намудани пойгоҳи истеҳсоли ин маҳсулот барои таъмини амнияти ғизоӣ омили зарурист. Кооперативҳои кишоварзӣ метавонанд дар ин самт саҳми назаррас дошта бошанд.
Афзоиши маҳсулнокии кишоварзӣ аксар вақт ба технологияҳои муосир, усулҳои истифодаи нуриҳо, системаҳои обёрӣ ва сифати тухмӣ вобастагии мустақим дорад. Инчунин, боло бурдани сатҳи донишу малакаи кишоварзон оид ба роҳҳои босамари зиёд кардани ҳаҷми истеҳсоли картошка ва ҳосилнокии он амалҳои саривақтӣ буда, ба таъмини амнияти озуқаворӣ ва сатҳи некуаҳволии мардуми деҳот мусоидат мекунанд.
- Дастгирии техникии кооперативҳо барои афзоиши даромади аҳолии деҳот ва таъмини амнияти озуқаворӣ аҳамияти калон дорад, - иброз дошт дар ин бора Олег Гучгелдиев, намояндаи ФАО дар Тоҷикистон.
Баланд бардоштани рақобатпазирӣ ва самаранокии соҳаи кишоварзӣ тавассути дастрасии беҳтар ба озуқаворӣ ҳадафҳои асосии лоиҳа мебошанд.
С. РАҶАБЗОДА,
“Ҷумҳурият”
Баёни ақида (0) Санаи нашр: 30.07.2020 №: 142 Мутолиа карданд: 799
