ҳуқуқ
ҲИСОР. «МУЛЛО» - И БАДАХЛОҚ ДАСТГИР ВА МУҶОЗОТ ШУД
Мутаассифона, дар ҷомеа баъзе ашхоси фиребгару бадахлоқ вомехӯранд, ки бо суиистифода аз эътиқоди динии мардум худро муллои ҷинбарор, фолбину дуохон ва ҳатто бахткушо муаррифӣ карда, ба хотири манфиати шахсӣ ва амалӣ намудани мақсадҳои нопоки худ бо корҳои зиддидинӣ ва зиддиқонунӣ даст мезананд. Маҳз чунин «муллоҳо» ба номи ислом иснод меоранд.
Ҷӯрабой Сочаев, сокини шаҳри Ҳисор, аз моҳҳои сентябр - октябри соли 2019 инҷониб дар маҳали зисташ худро муллои ҷинбарор эълон намуда, табобати шаҳрвандонро бе доштани маълумоти расмии динӣ дар намуди маҳсгарӣ, дуохонӣ, ҷинбарорӣ, сеҳру ҷоду ва бахткушоӣ ба роҳ монда, бо суиистифода аз боварии мизоҷон барои чунин аъмолаш маблағҳои пулӣ гирифта, ба шаҳрвандон зарари моддӣ расондааст.
Тавре маркази матбуоти Прокуратураи генералии Ҷумҳурии Тоҷикистон хабар медиҳад, номбурда аввалҳои моҳи октябри соли 2019 ба боварии шаҳрванд «А» даромада, ваъда медиҳад, ки аз баданаш ҷин ва сеҳру ҷодуро мебарорад ва ӯ шифо меёбад. Арзиши табобатро 3000 сомонӣ муқаррар кардааст. Шурӯъ аз ҳамон лаҳза то аввалҳои моҳи январи соли 2020 Ҷӯрабой Сочаев бо роҳи фиреб ва суиистифодаи боварӣ ҳафтае як-ду ва дар маҷмӯъ, даҳ маротиба дар манзили истиқоматиаш нисбат ба номбурда ҳаракатҳои бадахлоқона анҷом медиҳад. Инчунин, ӯ бо ин роҳ шаҳрванд «А» - ро ба гумроҳӣ андохта, барои маҳси бадан ва табобат аз маблағи болозикр 1600 сомониро тасарруф менамояд. Аммо аз ин табобат дар саломатии шаҳрванд «А» ягон беҳбудӣ пайдо намегардад.
Ғайр аз ин, зимни тафтиши пешакӣ 5 лаҳзаи содир гардидани чунин ҷиноятҳо аз ҷониби Ҷӯрабой Сочаев муайян ва ошкор шуд. Аз ҷумла, ӯ аз охирҳои моҳи январ то 25 феврали соли равон, чунин амалҳои зишти худро нисбат ба 5 нафари дигар анҷом додааст. Вобаста ба ин, нисбат ба Ҷ. Сочаев парвандаи ҷиноятӣ оғоз гардида, баъди анҷоми тафтиши пешакӣ бо тасдиқи фикри айбдоркунӣ ба суд ирсол шуд.
Бо ҳукми суди шаҳри Ҳисор нисбат ба Ҷӯрабой Сочаев бо дастрасии моддаҳои 1421 қисми 1 (алоқаи ҷинсӣ, дигар ҳаракатҳои хусусияти шаҳвонидошта ё ҳаракатҳои бадахлоқона бо суиистифода аз ҳиссиёт ва боварии динӣ) ва 247 қисми 3 банди “а” (қаллобӣ) Кодекси ҷиноятии Ҷумҳурии Тоҷикистон ҷазои маҳрум сохтан аз озодӣ ба муҳлати 6 моҳ ва ҷарима ба андозаи 100 нишондиҳанда барои ҳисобҳо баробар ба 5800 сомонӣ бо маҳрум кардан аз ҳуқуқи фаъолияти муайян таъйин карда шуд.
Лашкар ШАРИФЗОДА,
«Ҷумҳурият»
Баёни ақида (0) Санаи нашр: 12.08.2020 №: 151 Мутолиа карданд: 1475
