маориф
МАОРИФ. КИТОБ МАЪРИФАТ МЕАФЗОЯД!
Дар партави сиёсати фарҳангдӯстона ва ҷиҳати иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар тамоми ташкилоту муассисаҳои кишвар китобхонаҳои замонавӣ таъсис гардида, барои баланд бардоштани донишу ҷаҳонбинии кормандон, зиёд намудани муҳаббати онҳо ба китобу китобхонӣ шароити мусоид фароҳам меоранд.
Барҳақ, китоб дониш, фарҳангу маърифати ниёгон, адабиёту санъат, касбу ҳунар, расму оини гузаштаву муосир, ахлоқи мардуми кишвару ҷаҳонро фаро гирифта, асрҳои аср дар сатрҳои авроқаш ҳифз менамояд. Тавассути китоб фарҳанг ва илму техникаи мардуми ҷаҳонро меомӯзему дар навбати худ донишу фарҳангамонро ба мардуми олам шинос менамоем. Халқу миллате, ки ба ин ганҷи бебаҳо муҳаббат дорад, абадзинда хоҳад монд. Маҳз ба воситаи китоб инсон метавонад роҳи дурустро дар ҳаёт пеша созад ва аз таъриху фарҳанги худ бохабар шавад. Зеро китоб неруи бузург буда, онро метавон муъҷиза номид, зеро имрӯз муҳимтарин омили пешрафти ҷомеа доштани дониш ва иттилооти фаровон аст.
Тавре аз маркази матбуоти Хадамоти гумруки назди Ҳукумати Ҷумҳурии Тоҷикистон ба «Ҷумҳурият» иттиллоъ доданд, бо назардошти нақшу ҷойгоҳи хоси китоб дар рушду пешрафти инсоният ва ҷомеа дар назди раёсати хадамот китобхонаи муосир таъсис ёфт. Он ба талаботи замон ҷавобгӯ буда, дорои беш аз 7 ҳазор китоб, аз ҷумла китобҳои Пешвои миллат, адабиёти гуногуни илмӣ-соҳавӣ, осори шоирону нависандагони адабиёти классику муосири тоҷику ҷаҳон, мебошад.
Дар китобхонаи мазкур феҳристи китобҳо дар шакли электронӣ ва баргаҳо (картотека), андозабандии онҳо, муҳрбандӣ ва ба қайди инвентарӣ гирифтанашон роҳандозӣ гардидааст. Толори китобхона бо расми шоирону нависандагон оро дода шуда ва дар он «Гӯшаи ҳунарҳои мардумӣ» низ ташкил шудааст. Дар китобхона сабти аудиоии гуфторҳои адабӣ оид ба одоби касбӣ, панду ҳикмати бузургон ва одобу муошират мавҷуд буда, зуд-зуд ба маъраз гузошта мешавад.
Китобхона макони илму маърифат ба шумор рафта, ба кормандони мақомоти гумрук имкон медиҳад, ки барои такмили дониш, ҷаҳонбинӣ, малакаву маҳорати касбӣ ва дарёфти иттилоот аз он самаранок истифода баранд.
- Мо тасмим гирифтаем, ки дар оянда низ барои боз ҳам ғанӣ гардондани фонди захиравии китобхона аз адабиёти тозанашр ва иттилооти зарурӣ истифода намоем. Зеро ҳар фарде, ки имрӯз ба китобхона меояду аз махзани бебаҳои он истифода менамояд, бешубҳа, соҳиби маърифати комил ва камолоти баланди ақлонӣ мегардад, - мегӯяд Зуҳро Ҳасанзода, мудири китобхонаи Хадамоти гумруки назди Ҳукумати Ҷумҳурии Тоҷикистон.
Гулнисои САЪДОНШО, «Ҷумҳурият»
Баёни ақида (0) Санаи нашр: 14.08.2020 №: 152 - 153 Мутолиа карданд: 1639
