иқтисод
ҶАМШЕД ТАБАРЗОДА: «110 ЛОИҲАИ ИНВЕСТИТСИОНӢ ОМОДА АСТ»
Кормандони КВД «Хоҷагии манзилию коммуналӣ» дар нимсолаи аввали соли равон ба истифодабарандагони шаҳру ноҳияҳои ҷумҳурӣ ба маблағи 94 миллиону 724,7 ҳазор сомонӣ хизмати коммуналӣ расонданд, ки нисбат ба ҳамин давраи соли гузашта 6 миллиону 420,8 ҳазор сомонӣ зиёд буда, 107,3 дарсади нақшаро ташкил медиҳад. Корхонаҳои тобеъ дар шаҳру ноҳияҳои ҷумҳурӣ ба маблағи 36 миллиону 417,7 ҳазор сомонӣ корҳои коммуналиро иҷро карданд.
Муассисаи давлатии «Сарраёсати Тоҷикобдеҳот» барои русто ва чарогоҳҳои ҷумҳурӣ 6 миллиону 300 ҳазор метри мукааб (100 дарсади нақша) об интиқол дод. Муассиса бо мақсади бо оби нӯшоӣ таъмин кардани аҳолии деҳоти ҷумҳурӣ 110 лоиҳаи сармоягузориро таҳия карда, ба вазорату идораҳои дахлдор барои дарёфти сарчашмаи маблағгузорӣ пешниҳод кардааст.
Ҷамшед Табарзода, директори КВД «Хоҷагии манзилию коммуналӣ», гуфт, ки ҳоло бо дастгирии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои сохтмон, таҷдид ва барқарорсозии иншооти соҳа, аз ҷумла, обтаъминкунию канализатсияи шаҳру ноҳияҳо, сармояи институтҳои молиявии ҷаҳонӣ ҷалб гардидааст ва татбиқи 3 лоиҳаи инвеститсионӣ - «Барқарорсозии системаи обтаъминкунии шаҳрҳои Шимол - 1», «Барқарорсозии системаи обтаъминкунии шаҳрҳои Хатлон, марҳилаи 2» ва «Барқарорсозии системаи обтаъминкунии шаҳрҳои Шимол - 2» идома дорад. Дар ҷараёни татбиқи лоиҳаҳои мазкур насби 18380 метр лӯлаҳои полиэтилении қутрашон аз 63 то 400 мм, сохтмони ду ҳавзи оби нӯшоӣ, ду пойгоҳи обкашӣ, се иншооти безараргардонӣ, ду гузаргоҳ, 670 метр хати интиқоли барқ, пармакунии панҷ чоҳи амудӣ, насби чор обкаши горизонталӣ, ду трансформатор, барқарорсозии ду такшонгоҳ ва деворбандии 282 метри атрофи обанбор ба анҷом расида, корҳои дигар идома доранд.
Маркази идораи лоиҳаҳои рушди инфрасохтори маҳаллӣ (коммуналӣ) дар Ҷумҳурии Тоҷикистон лоиҳаи муштараки Ҳукумати Ҷумҳурии Тоҷикистон ва Бонки ҷаҳонӣ «Обтаъминкунӣ ва беҳдошти санитарӣ дар деҳот» - ро ба маблағи 58 миллион доллари ИМА амалӣ менамояд. Лоиҳа барои беҳтар кардани вазъи обтаъминкунӣ ва беҳдошти санитарӣ дар деҳот нигаронда шуда, дар шаҳру ноҳияҳои Бохтар, Вахш, Ҷалолиддини Балхӣ, Левакант, Дӯстӣ, Ҷайҳун ва Восеи вилояти Хатлон татбиқ мегардад.
Роҳандозии лоиҳаи «Обтаъминкунӣ ва беҳдошти санитарӣ дар деҳот» аз ҷумлаи тадбирҳое мебошад, ки дар доираи татбиқи ташаббуси Президенти Ҷумҳурии Тоҷикистон муҳтарам Эмомалӣ Раҳмон оид ба Даҳсолаи байналмилалии амал «Об барои рушди устувор, солҳои 2018 – 2028» амалӣ мешаванд. Баъди ба анҷом расидани лоиҳа, иловатан аз 180 ҳазор то 200 ҳазор нафар аҳолии деҳот ба оби нӯшоӣ дастрасӣ пайдо мекунад.
Барои сохтмон, барқарорсозӣ ва рушди соҳа аз ҳисоби буҷети ҷумҳуриявӣ 26,5 миллион сомонӣ ҷудо шудааст.
- Роҳбарият ва кормандони КВД «Хоҷагии манзилию коммуналӣ» минбаъд низ кӯшиш ба харҷ медиҳанд, ки дастуру ҳидоятҳои Президенти Ҷумҳурии Тоҷикистон муҳтарам Эмомалӣ Раҳмонро сари вақт амалӣ созанд ва ба мардум хизмати арзандаи замонавӣ расонанд, - гуфт Ҷамшед Табарзода.
Кароматулло АТО,
«Ҷумҳурият»
Баёни ақида (0) Санаи нашр: 17.08.2020 №: 154 - 155 Мутолиа карданд: 1159
