ҳуқуқ
ҶИНОЯТ ВА ҶАЗО
8 000 ДОЛЛАР
Омӯзгор барои қаллобӣ дастгир шуд
Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз дастгир шудани Мунира Негматова, омӯзгори Донишгоҳи давлатии Хуҷанд ба номи Бобоҷон Ғафуров, хабар дод, ки барои ба Донишгоҳи давлатии тиббии Тоҷикистон ба номи Абуалӣ ибни Сино дохил намудани хеши шаҳрванд «А» бо роҳи фиреб ва суиистифодаи боварӣ 8 000 доллари ИМА талаб намудааст.
Тибқи иттилои манбаъ, Мунира Негматова 27 апрели соли 2020 дар натиҷаи гузарондани чорабиниҳои фаврӣ - тафтишотӣ баъди аз шаҳрванд «А» гирифтани 8000 доллар дастгир гардида, маблағи мазкур аз ӯ ҳамчун далели шайъӣ дарёфт ва гирифта шуд.
Вобаста ба ин, нисбат ба М. Негматова бо моддаи 247 қисми 4 банди «б»-и Кодекси ҷиноятии Ҷумҳурии Тоҷикистон парвандаи ҷиноятӣ оғоз шуда, тафтиши пешакӣ идома дорад.
СИЛСИЛАҚАЛЛОБӢ
ба маблағи махсусан калон
Ба ШВКД-1 дар ноҳияи Шоҳмансур бо ариза марди 47-сола, сокини шаҳри Душанбе, муроҷиат намуд, ки моҳи марти соли 2014, дар шаҳри Душанбе марди 31-солаи сокини пойтахт, ки пеш бо моддаи 247 –и Кодекси ҷиноятӣ суд шудааст, бо роҳи фиреб ба бовариаш даромада, аз ӯ барои тиҷорат 102500 доллари амрикоӣ гирифта, то ҳол барнагардондааст.
Тавре дафтари матбуоти ВКД хабар медиҳад, гумонбар бо ҳамин роҳ ба боварии марди 29 - солаи сокини дигари шаҳри Душанбе даромада, аз ӯ барои тиҷорат 63 ҳазору 837 доллар гирифта, то ҳол барнагардондааст.
Аз рӯи ин ҳодисаҳо тафтишот идома дорад.
ДУЗДИИ ЧОРВО
Гумонбарон ба даст афтоданд
Ба ШВКД дар ноҳияи Панҷ сокини 65-солаи деҳоти Ваҳдати ноҳия муроҷиат намудааст, ки 23 июли соли 2020, шахсони номаълум бо роҳи пинҳонӣ аз назди чарогоҳи деҳоти мазкур як сар чорвои калони шохдорро дуздида, аз ҷойи ҳодиса ғайб задаанд. Маблағи зарар 10 ҳазор сомониро ташкил медиҳад.
Бино ба иттилои ВКД, ҳангоми гузарондани чорабиниҳои фаврӣ - ҷустуҷӯӣ аз ҷониби кормандони милитсия мардони 29 ва 43 - солаи сокинони ҳамин ноҳия, инчунин, сокини 19 - солаи ноҳияи Темурмалик бо гумони содир намудани ҷинояти дуздӣ дастгир шуданд.
Ҳамчунин, номбурдагон бо ҳамин роҳ 31 июли соли равон, аз заминҳои хоҷагии деҳаи Гулистон як сар чорвои калони шохдори дигарро низ дуздида, аз ҷойи ҳодиса ғайб задаанд. Зарари расондашуда 5 ҳазор сомониро ташкил медиҳад. Аз рӯи ин ҳодисаҳо тафтишот идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 18.08.2020 №: 156 Мутолиа карданд: 925
