сиёсат
АНҶОМИ САФАРИ КОРӢ ДАР ВИЛОЯТИ МУХТОРИ КӮҲИСТОНИ БАДАХШОН
22 август, пас аз анҷоми сафари корӣ дар шаҳру ноҳияҳои Вилояти Мухтори Кӯҳистони Бадахшон, Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба шаҳри Душанбе баргаштанд.
Дар фурудгоҳи шаҳри Хоруғ меҳмони олимақом - Пешвои миллат муҳтарам Эмомалӣ Раҳмонро роҳбарият ва фаъолони вилоят бо самимияти хосса гусел карданд.
Ёдовар мешавем, ки боздиди кории Президенти Ҷумҳурии Тоҷикистон муҳтарам Эмомалӣ Раҳмон дар вилоят аз 19 то 22 август идома ёфт.
Ин сафар чун ташрифҳои қаблии Роҳбари давлат аз ин минтақаи дурдасти мамлакат, бобарор буд, зеро давоми 4 рӯз бо иштироки Пешвои миллат дар ноҳияҳои Дарвоз, Ванҷ, Рӯшон ва шаҳри Хоруғ даҳҳо иншооти наву муосир мавриди истифода қарор гирифта, ҷиҳати бунёди як қатор иншооти муҳими дигар санги асос гузошта шуд.
Аксари иншооти наве, ки сохтмонашон зимни ин сафар ба нақша гирифта шуданд, то Ҷашни 30-солагии Истиқлолияти давлатии Ҷумҳурии Тоҷикистон мавриди баҳрабардорӣ қарор мегиранд.
Маҳз таваҷҷуҳи зиёд ва дастуру ҳидоятҳои пайвастаи Пешвои муаззами миллат муҳтарам Эмомалӣ Раҳмон боис гардид, ки қатъи назар аз дурии роҳ ва иқлиму релйефи номусоид, ҳамаи шаҳру ноҳияҳои ин минтақаи дурдасти мамлакат рушду инкишоф ёфта, ВМКБ тадриҷан, ба "дарвозаи тиллоӣ" - и Тоҷикистон табдил меёбад.
Баёни ақида (0) Санаи нашр: 24.08.2020 №: 161 Мутолиа карданд: 724
