ҳуқуқ
«ПРАНК». БОЗДОШТИ СЕ БЛОГЕР БАРОИ ПАСТ ЗАДАНИ ШАЪНУ ШАРАФИ ЯК НОБОЛИҒ
Паст задани шаъну шарафи ноболиғ ва мавриди масхараву озор қарор додани ӯ мувофиқи қонунгузории Ҷумҳурии Тоҷикистон ва санадҳои байналмилалие, ки кишвари мо онҳоро эътироф кардааст, манъ мебошад. Нисбат ба он нафароне, ки даст ба чунин аъмол мезананд, чораҳои дахлдори қонунӣ дида мешаванд.
Чунин як амали номатлуб 11 августи соли ҷорӣ аз ҷониби 3 шахси ба ном «блогер» анҷом дода шуда, навори он дар шабакаҳои иҷтимоӣ пахш гардид. Ин кирдори блогерон мавриди вокуниши шадиди ҷомеаи шаҳрвандӣ ва истифодабарандагони шабакаҳои иҷтимоӣ қарор гирифт. Чуноне дар навор дида мешавад, як ҷавондухтар ҳамроҳи ду ҷавонмард ба тани писарбачаи ноболиғ куртаи чакани духтарона пӯшонда, рӯяшро ҳамчун духтар бо маҳсулоти ороишӣ (косметикӣ) рангубор намуда, бар замми ин дар сараш тухм мешикананд.
Дар рафти тамошои навор кирдорҳои зиддиқонунии «блогер» - ҳо, ки ноболиғро масхара мекунанд дида мешавад. Ҳамзамон, ҳолати оҷизиву сарафкандагии ноболиғ дар дили ҳар нафар раҳму шафқат ва нисбат ба кирдори ношоистаи ин ҷавонон хашму ғазабро меорад. Ба хотири маблағ, зиёд намудани шумораи ҳаводорони саҳифаашон ин блогерон даст ба амалу кирдорҳое мезананд, ки хилофи меъёрҳои ахлоқӣ ва дур аз одобу рафтори инсонӣ мебошад.
Чанде нагузашта кормандони раёсати Вазорати корҳои дохилӣ дар шаҳри Душанбе дар натиҷаи пешбурди корҳои фаврӣ - ҷустуҷӯӣ омодакунандагони навор Аҳлиддин Хоҷаев, (маъруф бо лақаби «Кучкар» миёни блогерҳо), Акбар Муҳаммадиев ва Матлуба Кулиеваро дастгир карданд.
Зимни тафтиши ҳодисаи мазкур маълум шуд, ки «пранк» - и ғайриахлоқӣ бо маслиҳати пешакӣ ва розигии худи писарбачаи ноболиғ ба навор гирифта шудааст. Бо назардошти ҳолати мазкур барои поймол намудани ҳуқуқҳои ноболиғ, ба таври оммавӣ паст задани шаъну шараф ва мавриди масхараву мазаммат қарор додани ноболиғ, ки муқаррароти Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» вайрон гардидааст, нисбат ба ҳамаи боздоштшудаҳо парвандаи маъмурӣ тартиб дода шуда, бо қарори суд ба Аҳлиддин Хоҷаев ва Акбар Муҳаммадиев ба муҳлатҳои 5 ва 7 шабонарӯзӣ дар ҳабс гирифтан ва ба Матлуба Кулиева шартан ҷаримаи маъмурӣ ба андозаи 7 нишондиҳанда барои ҳисобҳо, баробар ба 406 сомонӣ таъйин гардид.
Сафаргул АЛИМОВА, Ҷумҳурият»
Баёни ақида (0) Санаи нашр: 26.08.2020 №: 162 Мутолиа карданд: 940
