номаҳо
ФЕРМАИ ХУРД Ё ХОНАИ ЗИСТ?
Хонаи ман ва дигар ҳамсояҳо дар назди бинои идораи коммуналии шаҳр аст. Яъне, то ҷое, ба яқин, аз мушкилотамон масъулони он огоҳ мебошанд, чаро ки кормандонашон ҳам мисли мо ранҷ мебаранд. Сухан дар бораи вайрон кардани вазъи экологӣ ва риоя накардани қоидаҳои шаҳрдорӣ меравад. Дар як хона, ки дар наздикии мо ҷой дорад, то бист гов парвариш меёбад, албатта, ба хотири куштану бурда фурӯхтан. Ин амалҳо, яъне забҳ низ дар ҳамин ҳавлӣ ҳар рӯз сурат мегирад.
Ҳамин тавр, моро як нафар аз амнияти экологӣ маҳрум намудааст. Нафасгирӣ бо ин ҳоли ногувор бароямон мушкил гардид. Муроҷиати мо дар ин хусус ба ӯ нафъе набахшид.
Наход шаҳр, маркази вилоят ҷойи парвариши гов ва барои забҳ бошад. Агар чор - панҷ гов мебуд, шояд таҳаммул карда метавонистем. Бешак, исботро хоҳон нест, ки парвариши бист гов ва ҳар рӯз куштани онҳо бо рехтани хун ба зиндагии мо, нафаскашиямон таъсири манфии худро мерасонад.
Умед дорем, ки масъулони шаҳр сари ин масъала ва пешгирии амалҳои номатлуб тадбирҳои заруриро сари вақт меандешанд. Охир хонаи зист дар шаҳр аз фермаи хурд ва ё калон бояд фарқ бикунад. Магар андешидаем, ки агар ҳар кадоми мо – соҳибони хона ба парвариши бист ва зиёда аз он гову забҳаш машғул бишавем, ба чӣ оқибати баде рӯ ба рӯ мешавем?
Мирзоалӣ САЛИМОВ,
шаҳри Бохтар, кӯчаи ба номи академик Муҳаммад Осимӣ
Баёни ақида (0) Санаи нашр: 27.08.2020 №: 163 Мутолиа карданд: 4672
