ҳуқуқ
ТЕРРОРИЗМ. МУБОРИЗАИ ТОҶИКИСТОН БО ИН ЗУҲУРОТ ШОИСТАИ ТАҲСИН АСТ
Имрӯз дар тамоми ҷаҳон терроризм ва экстремизм яке аз проблемаҳои асосӣ маҳсуб меёбад, ки ҷангу хунрезиро ба бор оварда, боиси ҳалокат ва бесарусомонии садҳо ҳазор мардуми осоишта гардидааст. Ҷумҳурии Тоҷикистон аз ҷумлаи давлатҳоест, ки бар зидди ин ду зуҳурот муборизаи беамон мебарад. Дар ин раванд мубориза бо терроризм ва экстремизм қисми таркибии таъмини амнияти кишварро ташкил медиҳад. Роҳу усули он муфассал дар «Стратегияи миллии Ҷумҳурии Тоҷикистон оид ба муқовимат ба экстремизм ва терроризм барои солҳои 2016 - 2020» инъикос ёфтааст.
Боиси нигаронист, ки бо ваъдаҳои дурӯғ бештар ҷавонон ба ин гурӯҳҳо ҷалб мешаванд. Онҳо гумон мекунанд, ки бо ворид шудан ба ин гурӯҳҳо маблағи зиёд ба даст меоранд. Чашмони онҳоро пулу моли зиёди ваъдашуда чунон кӯр кардааст, ки зану фарзанд ва ҳатто падару модарашонро намебинанд.
Имрӯз садҳо ҳазор одамон дар ҳар гӯшаи сайёра ба ҷангу даргириҳо рӯ ба рӯ шудаанд ва терроризму экстремизм ҳамчун падидаи харобиовар ба тамоми соҳаҳо, аз ҷумла иқтисодӣ, иҷтимоӣ ва фарҳангӣ, зарбаҳои муҳлик мезанад.
Тибқи маълумоти Маркази иттилоотии гурӯҳи Ҷейн (Jane”s information Group), доир ба омӯзиши масъалаҳои терроризм соли 2018 дар саросари ҷаҳон 15,3 ҳазор ҳамлаи террористӣ содир шудааст. Агар ин рақамро ба соли 2017 қиёс намоем 6716 адад зиёд мебошад.
Ин зуҳуроти номатлуб дар баробари дигар бахшҳо ба вазъи иқтисодии кишварҳо таъсири манфӣ мегузорад. Масалан, ҳаракатҳои террористӣ дар Алҷазоир солҳои 1996 – 2001 ба иқтисодиёти ин кишвар дар ҳаҷми 16 миллиард доллари ИМА хисороти молиявӣ расонд.
Яке аз ҳаракатҳои террористие, ки ба вазъи иқтисодии ҷаҳон ва сиёсати байналмилалӣ таъсири бузург расондааст - ин ҳамлаҳои террористии Ал-Қоида ба Ню-Йорк ва Вашингтон мебошад, ки дар он беш аз 3 ҳазор нафар куштаву тақрибан 6 ҳазор нафар маҷрӯҳ шуданд. Ҳамчунин, мувофиқи далелҳои Ассотсиатсияи индустрияи туристии Амрико, пас аз панҷ моҳи ҳамлаҳои соли 2001-ум 237 ҳазор нафар дар тиҷорати сайёҳӣ бекор монданд. Ширкатҳои ҳавопаймоӣ ба мушкилоти ҷиддӣ рӯ ба рӯ шуданд ва зарари онҳо ба 30 миллиард доллар расид. Ин талафот рақамҳои хурд нестанд ва боиси монеи рушди кишварҳои ҷаҳон мегарданд.
Ҷумҳурии Тоҷикистон, ки оқибатҳои фоҷиабори терроризму ифротгароиро аз сар гузарондааст, тайи чанд соли охир дар самти муқовимат бо зуҳуроти мазкур ва манбаъҳои маблағгузории онҳо тадбирҳои муассирро роҳандозӣ карда истодааст. Дар кишвар ҳама гуна маблағгузории терроризм ҷиноят эътироф гардидааст, ки ин далелҳо аз фаъолияти судманди Ҳукумати кишвар ва мақомоти дахлдор шаҳодат медиҳанд.
Мансур ҚАЛАНДАРЗОДА,
судяи Суди Олии иқтисодии Ҷумҳурии Тоҷикистон
Баёни ақида (0) Санаи нашр: 02.09.2020 №: 167 Мутолиа карданд: 740