ҳуқуқ
ҶИНОЯТ ВА ҶАЗО
НОҲИЯИ ВОСЕЪ
Раиси деҳоти Тугарак барои қаллобӣ дастгир шуд
Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз боздошти Ҳалимов Амирхон Бобохонович, раиси деҳоти Тугараки ноҳияи Восеъ, бо ҷурми қаллобӣ хабар дод.
Ба иттилои манбаъ, Амирхон Ҳалимов ҳамчун шахси мансабдор бо истифода аз мақоми хизматӣ, 1 июни соли равон аз шаҳрванд “А” барои аз ҳудуди деҳоти мазкур ҷудо карда додани 0,05 га. қитъаи замини наздиҳавлигӣ 14000 сомонӣ талаб намуда, аз ин 5000 сомониашро пешакӣ гирифт ва овардани маблағи боқимондаро талаб кардааст.
3 июни соли 2020 дар натиҷаи гузарондани чорабиниҳои фаврӣ - тафтишотӣ баъди аз шаҳрванд “А” гирифтани 9000 сомонӣ дар ҷои ҳодиса дастгир шуда, маблағи мазкур аз ӯ дарёфт гардид.
Вобаста ба ҳолати мазкур нисбат ба А. Ҳалимов бо моддаи 247 қисми 4 банди “б” Кодекси ҷиноятии Ҷумҳурии Тоҷикистон парвандаи ҷиноятӣ оғоз шуда, тафтишот идома дорад.
ҚАЛЛОБӢ
Ду ҳолат ба маблағи махсусан калон
Ба ШВКД-1 дар ноҳияи Сино марди 36-солаи сокини пойтахт муроҷиат намудааст, ки 6 августи соли равон, марди 40-солаи сокини деҳоти Хераварзи ноҳияи Ҷалолиддини Балхӣ бо роҳи фиреб ба бовариаш даромада, аз ӯ 30 тонна ордро ба маблағи 55 ҳазору 503 доллари амрикоӣ барои фурӯхтан гирифта, маблағашро ба манфиати шахсиаш сарф намудааст.
Ҳамчунин, аз маркази матбуоти Вазорати корҳои дохилӣ хабар доданд, ки ба ШВКД дар шаҳри Ваҳдат марди 66-солаи сокини шаҳри Душанбе, муроҷиат намудааст, ки соли 2016, ду ҷавони 26-сола - сокинони деҳоти Гулистони шаҳри Ваҳдат бо роҳи фиреб ба бовариаш даромада, аз ӯ 96 ҳазор сомонӣ гирифта, ваъда додаанд, ки хоҷагии деҳқонии фермерии ба номи “Маҳмуд” бо бинои ёрирасон, дар деҳоти Гулистонро ба номаш ҳуҷҷатгузорӣ карда медиҳанд. Аммо маблағи гирифтаашонро ба манфиати шахсиашон сарф намудаанд.
Аз рӯи ин ҳодисаҳо тафтишот идома дорад.
ПАНҶАКЕНТ
Қатли бародар аз ҷониби бародар
Рӯзи 27 августи соли 2020, тахминан соати 20:00 марди 57-сола, сокини шаҳри Панҷакент, ки пеш бо моддаи 201 қисми 1 Кодекси ҷиноятии Ҷумҳурии Тоҷикистон суд шудааст, дар ҳавлии истиқоматии сохтмонаш нотамом, воқеъ дар шаҳраки Саразм, бо бародараш марди 62-сола ҷангу ҷанҷол намуда, бо корди хоҷагӣ 8 маротиба ба бадани ӯ задааст.
Тавре Вазорати корҳои дохилӣ хабар медиҳад, дар натиҷаи ин муноқиша, бародараш ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидааст.
Нисбат ба гумонбаршаванда парвандаи ҷиноятӣ бо моддаи 104 қисми 1 Кодекси ҷиноятӣ оғоз шуда, тафтишот идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 03.09.2020 №: 168 Мутолиа карданд: 1009