порлумон
ВАНҶ. БА ХОТИРИ ФАРДОИ ДУРАХШОН
Дар ҳамаи 8 ҳудуди шаҳр ва навоҳии Вилояти Мухтори Кӯҳистони Бадахшон, аз ҷумла дар деҳоти водиҳои Вахё, Ванҷи Боло, Язгулом, Бартанг, Ғунд, Шоҳдара, Ғорону Вахон ва саросари авулҳои тоҷик ва қирғизнишини ноҳияи Мурғоби Помири шарқӣ омодагиҳо ба интихоботи Президенти Ҷумҳурии Тоҷикистон, ки 11 октябри соли 2020 баргузор мегардад, хуб ҷараён доранд.
Зикр кардан ба маврид аст, ки дар ноҳияи Ванҷ бо мақсади дар асоси талаботи Конститутсияи Ҷумҳурии Тоҷикистон ва дигар қонунҳои амалкунандаи мамлакат дар сатҳи баланд баргузор намудани маъракаи муҳими сиёсӣ - интихоботи Президенти Ҷумҳурии Тоҷикистон тадбирҳои зиёде андешида шудаанд. Дар ин хусус раиси комиссияи ҳавзаи интихоботии Ванҷ, рақами 19 оид ба интихоботи Президенти Ҷумҳурии Тоҷикистон Ёдгоршо Шеров гуфт, ки дар деҳоти Вотхуд, ба номи Муҳаммадулло Абдуллоев, Ҷовидон, Техарв, Рованд ва Язгулом 40 участкаи интихоботӣ ташкил гаштааст. Аз ҷониби масъулон барои дар рӯҳияи баланди худшиносии миллӣ, муташаккилона ва ба тарзи шаффоф гузарондани ин маъракаи муҳими сиёсӣ барои участкаҳои интихоботӣ беҳтарин ва қулайтарин иморатҳо - биноҳои муассисаҳои таҳсилоти миёнаи умумӣ, хонаҳои фарҳанг, клубҳо, марказҳои саломатӣ ва бунгоҳҳои тиббӣ хоста гирифта шуда, мувофиқи талаботи қонунгузориҳо хуб таҷҳизонда шудаанд ва ба фаъолият сар кардаанд.
Дар ҳавзаи интихоботии Ванҷ, № 19 Конститутсияи Ҷумҳурии Тоҷикистон, Қонуни Ҷумҳурии Тоҷикистон «Дар бораи интихоботи Президенти Ҷумҳурии Тоҷикистон» ва дигар адабиётҳо, дастурамалҳо ва асбобу анҷомҳои зарурӣ ворид гардида, ба ҳамаи 40 участкаи интихоботӣ, дар мадди аввал ба дурдасттарин деҳоти Поимазор, Ванван, Сумгад, Мурғудга, Жамагу Зайч, Пшихарву Узбай расонда шудаанд. Аз таҷҳизондани кабинаҳои овоздиҳӣ ва тайёр кардани қуттиҳои сайёри овоздиҳӣ барои маъюбон, пирон ва беморон сар карда то ҷузъитарин корҳои омодагӣ дида шудаанд.
Ҳамчунин, коргарони муассисаи давлатии нигаҳдории роҳҳои автомобилгарди ноҳияи Ванҷ дар ҳамин рӯзҳо тариқи техникаи нав, ки бо дастгириҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби Вазорати нақлиёти мамлакат бо маблағгузории Ҳукумати кишвар дастрас кардаанд, қитъаҳои роҳи осебпазири мавзеъҳои Мурғудга – Ванван – Змахсум - Поимазори подомони пиряхҳои Федченко ва Хирсонро, ки мавҷҳои хурӯшони аз соҳилҳо баромадаи Ванҷоб вайрону валангор карда буданд, таъмир ва тармим кардаанд. Ҳоло дар ҳамаи участкаҳои интихоботӣ алоқаи устувори телефонӣ барқарор буда, навбатдории шабонарӯзии аъзои комиссияҳои участкаҳои интихоботӣ ташкил карда шудааст.
Муҳаммадзоиршо ШАРИФЗОДА, «Ҷумҳурият»,
Сироншоҳи ДИЛОВАР, рӯзноманигор
Баёни ақида (0) Санаи нашр: 17.09.2020 №: 178 Мутолиа карданд: 9094
