иқтисод
ҲИСОР. 30 - СОЛАГИИ ИСТИҚЛОЛ ТАНТАНА ХОҲАД ДОШТ
Дар шаҳри Ҳисор барои истиқболи сазовори Ҷашни 30 - солагии Истиқлолияти давлатии Ҷумҳурии Тоҷикистон омодагии хуб гирифтаанд. Дар ин водии зархез ба истиқболи ҷашн иншооти таъйиноташон гуногун бо тарҳу намои муосир, ҷавобгӯ ба талаботи стандартҳои байналмилалӣ қомат афрохта, ба ҳусни шаҳр зебоии хосса зам намудаанд.
Айни ҳол бо саҳми мақомоти иҷроияи ҳокимияти давлатии шаҳр, соҳибкорон, ҷавонмардони баору номус, ашхоси саховатпеша ва мардуми заҳматдӯсти маҳаллӣ раванди корҳои ободонӣ, таҷдиду азнавсозии роҳҳо, хурраму зебо гардондани марзи шаҳр бомаром идома дорад. Дар ин гӯшаи зебои куҳандиёр ҳамарӯза навгоние дида мешавад, ки ин ҳама аз рӯҳияи баланди ватандӯстӣ, шукрона аз Ватани азизу маҳбуб, ваҳдати миллӣ ва оромию осоиштагии кишвар гувоҳӣ медиҳад. Сокинони шаҳр аз хонаи худ сар карда, кӯчаю маҳалла ва деҳоту шаҳракҳои аҳолинишинро тозаю дилкаш кардаанд.
Тавре Тоҷиддин Шамсиддинов, мудири бахши меъморӣ ва шаҳрсозии шаҳри Ҳисор, иброз дошт, ба ифтихори ҷашн 261 иншооти таъйиноти гуногун мавриди истифода қарор гирифта, дар иншооти дигар корҳои сохтмонӣ идома доранд.Дар остонаи ҷашн зиёда аз 100 иншоот ба истифода дода хоҳад шуд.
Дар нимсолаи аввали соли равон бо ҷалби соҳибкорон ва шахсони саховатпеша таъмири 35 километр роҳ, сохтмон ва таъмири 4 пул, 64 километр хати барқ, 3 километр чароғонкунии кӯчаҳо, насби 34 зеристгоҳи барқӣ (трансформатор) ва 94 сутуни равшанидиҳанда, кашидани 4 километр хати оби нӯшоӣ, 88 метр лӯлаи обгузар анҷом дода шуд. Инчунин, дар масофаи беш аз 1 километр ҷӯйборҳои бетонӣ насб гардида, 88 километр роҳҳои деҳаҳо сангфарш ва 4 километр роҳ бетонпӯш карда шуд.
Соли ҷорӣ боз сохта ба истифода додани 219 ва соли оянда 212 биною иншооти таъйиноташ гуногун ба нақша гирифта шудааст. Бунёди иншооти нав аз як тараф ба рушду зебоии кӯчаҳои шаҳр мусоидат намояд, аз ҷониби дигар, сокинон бо ҷои кор таъмин гашта, вазъи зиндагии худро беҳ месозанд. Ҳамзамон, онҳо таҷрибаи баланди сохтмонию меъмориро аз бар намуда, барои шукуфоии Ватани азизамон саҳми худро мегузоранд.
Дар доираи бунёди иншооти ҷашнӣ дар ҳудуди шаҳр зиёда аз 30 бинои баландошёнаи истиқоматӣ бо санъати баланди меъморӣ қомат афрохта истодааст. Бунёди маҷмааи нави замонавӣ, иборат аз 4 бино, аз ҷумла як бинои 10 - ошёна, 2 бинои 12 - ошёна ва 1 бинои 16 - ошёна, дар маркази шаҳр аз ҷониби мутахассисону сохтмончиёни ҶДММ “Сохтмонқалъа”бовусъат идома дорад.
Дар мавзеи ҷолиб, дилкаш ва назаррабои “Ҳисор сити” дар майдони умумии 8000 метри мураббаъ биноҳои 16 ва 18 - ошёнаи зебову замонавӣ қад меафрозанд, ки дорои майдончаҳои варзиш, таваққуфгоҳ барои воситаҳои нақлиёт ва марказҳои савдою хизматрасонӣ мебошанд.
Мақомоти иҷроияи ҳокимияти давлатии шаҳри Ҳисор ҷиҳати татбиқи ҳадафи чоруми стратегӣ - саноатикунонии босуръати кишвар нақшаҳои зиёд тарҳрезӣ намуда, барои бунёди корхонаҳои нави бо технологияҳои муосир муҷаҳҳаз ва зиёд намудани ҳаҷми истеҳсоли маҳсулоти саноатӣ тадбирҳои мушаххас роҳандозӣ намудааст. Теъдоди умумии корхонаҳои саноатӣ то имрӯз ба 69 адад расидааст. Танҳо аз соли 2018 то инҷониб дар ҳудуди шаҳр бо ҷалби соҳибкорон 14 корхонаи хурду миёна ба фаъолият пардохт, ки барои таъсиси ҷойҳои нави корӣ мусоидат намуданд.
Дар ин давра як мактаби нав барои 640 хонанда дар як баст ва 11 синфхонаи иловагии бо лавозимоти хониш муҷаҳҳаз сохта ба истифода дода шуд. Инчунин, сохтмони 65 синфхонаи иловагии дигар ба нақша гирифта шуда, корҳои сохтмонӣ дар онҳо идома доранд.
- Бо мақсади вусъат бахшидан ба корҳои бунёдкориву созандагӣ ҳар моҳ ду маротиба ситоди корӣ гузаронда шуда, рафти корҳои сохтмонӣ мавриди таҳлил ва баррасӣ қарор мегирад, - гуфт Тоҷиддин Шамсиддинов.
Матлубаи АБДУҚАҲҲОР, “Ҷумҳурият”
Баёни ақида (0) Санаи нашр: 18.09.2020 №: 179 Мутолиа карданд: 700
