ҳуқуқ
ҶИНОЯТ ва ҶАЗО
ПОРА
корманди андозро ба толори суд бурд
Агентии назорати давлатии молиявӣ ва мубориза бо коррупсияи Ҷумҳурии Тоҷикистон парвандаи ҷиноятӣ нисбат ба Рустам Азиззода, мутахассиси нозироти андози ноҳияи Шоҳмансурро баъд аз анҷоми тафтиши пешакӣ ба суд ирсол намуд.
Дар ин бора маркази матбуоти агентӣ хабар дод. Тибқи иттилои манбаъ, Рустам Азиззода 12 июни соли 2020 аз шаҳрванд «А» барои тартиб додани санади муқоисавӣ ва минбаъд мусоидат намудан дар қатъ намудани фаъолияти соҳибкорӣ 5000 сомонӣ ба сифати пора талаб намуда, аз ин маблағ 1250 сомониашро пешакӣ гирифтааст. Дар ҳамин ҳол, 17 июли соли ҷорӣ ҳангоми гирифтани қисми дигари маблағи талабшуда дар ҳаҷми 1500 сомонӣ ба даст афтодааст.
Парвандаи ҷиноятӣ нисбат ба корманди мақомоти андоз бо моддаи 319 қисми 1 Кодекси ҷиноятии Ҷумҳурии Тоҷикистон (гирифтани пора аз ҷониби шахси мансабдор…) оғоз гардидааст, ки ин банди қонун ҷарима ба андозаи аз се ҳазору шашсаду панҷоҳ то нуҳ ҳазору яксаду бисту панҷ нишондиҳанда барои ҳисобҳо ё маҳрум сохтан аз озодӣ ба муҳлати то панҷ солро пешбинӣ мекунад.
ТАСАРРУФИ 7190 СОМОНӢ
Ғоратгари фирорӣ ба дасти милитсия афтод
Кормандони мақомоти милитсия дар шаҳри Панҷакент як сокини шаҳрро, ки аз ӯ ҷавони 23-сола ном бурда мешавад, ба гумони содир намудани ҷинояти ғоратгарӣ дастгир намуданд.
Бино ба иттилои сомонаи ВКД, боздоштшуда шоми 4 августи соли ҷорӣ дар ҳолати мастӣ бо роҳи зӯроварӣ аз дасти ҷавони 18 - солаи сокини шаҳри Панҷакент 7 ҳазору 190 сомониро тасарруф намуда, аз ҷойи ҳодиса ғайб задааст.
Ҳодиса дар майдони варзишии МТМУ № 29-и шаҳр ба амал омада, ҳоло алайҳи гумонбар бо моддаи 248 қисми 2 Кодекси ҷиноятӣ (ғоратгарӣ бо истифодаи зӯроварӣ) парвандаи ҷиноятӣ оғоз гардида, тафтишот идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 18.09.2020 №: 179 Мутолиа карданд: 1404
