ҳуқуқ
ҶИНОЯТ ВА ҶАЗО
ПОРА
боз як заминфурӯшро ба толори суд бурд
Агентии назорати давлатии молиявӣ ва мубориза бо коррупсияи Ҷумҳурии Тоҷикистон парвандаи ҷиноятӣ нисбат ба Зокирҷон Зокиров - муовини раиси Ҷамоати деҳоти Ҳисори шаҳри Ҳисорро баъд аз анҷоми тафтиши пешакӣ ба суд ирсол намуд.
Дар ин бора маркази матбуоти агентӣ хабар дод. Тибқи иттилои манбаъ, номбурда ҳанӯз моҳи майи соли 2020 аз шаҳрванд «А» барои ҷудо карда додани 0,06 гектар қитъаи замини наздиҳавлигӣ бо роҳи қаллобӣ 15000 сомонӣ талаб намуда, аз ин 8000 сомониашро пешакӣ гирифтааст. Дар ҳамин ҳол, 18 июни соли ҷорӣ ҳангоми гирифтани қисми дигари маблағи талабшуда дастгир ва маблағҳои пулӣ ҳамчун далели шайъӣ аз ӯ гирифта шуд.
Тафтиши пешакии парвандаи ҷиноятӣ нисбат ба ӯ бо моддаи 319 қисми 1-и Кодекси ҷиноятӣ (гирифтани пора аз ҷониби шахси мансабдор…) сурат гирифтааст, ки ин банди қонун ҷазо дар намуди ҷарима ба андозаи аз се ҳазору шашсаду панҷоҳ то нуҳ ҳазору яксаду бисту панҷ нишондиҳанда барои ҳисобҳо ё маҳрум сохтан аз озодӣ ба муҳлати то панҷ солро пешбинӣ менамояд.
КОРДЗАНӢ ДАР ҲОЛАТИ МАСТӢ
Ё БОЗДОШТИ МАРДЕ, КИ ҚАБЛАН СУД ШУДААСТ
Мақомоти корҳои дохилӣ дар шаҳри Исфара марди 61 - соларо бо гумони қасдан расондани зарари вазнин ба саломатӣ боздошт намуданд, ки дар ҳолати мастӣ як сокини шаҳрро бо зарби корд маҷрӯҳ кардааст.
Бино ба иттилои сомонаи ВКД, гумонбар, ки қаблан бо моддаи 244 Кодекси ҷиноятӣ (дуздӣ) суд шудааст, нимаи дуюми рӯзи 25 сентябр даст ба чунин амал задааст. Ӯ дар ҳолати мастӣ дар кӯчаи Авитсенаи Ҷамоати шаҳраки Шӯроб бо марди 42 – сола муноқиша карда, бо истифода аз корд ба ҷабрдида ҷароҳати вазнини ҷисмонӣ расондааст.
Ҳоло нисбат ба гумонбаршаванда бо моддаи 110 қисми 1 Кодекси ҷиноятӣ (қасдан расондани зарари вазнин ба саломатӣ) парвандаи ҷиноятӣ оғоз гардида, тафтишот идома дорад.
Баёни ақида (0) Санаи нашр: 01.10.2020 №: 192 Мутолиа карданд: 894
