порлумон
МАҶЛИСИ НАМОЯНДАГОН. СЕ СОЗИШНОМА БА ТАСВИБ РАСИД
Дар ҷаласаи навбатии Маҷлиси намояндагони Маҷлиси Олии Ҷумҳурии Тоҷикистон, ки таҳти раёсати Маҳмадтоир Зокирзода, Раиси Маҷлиси намояндагон, баргузор гардид, Созишнома оид ба пешниҳоди қарзи молиявӣ аз воситаҳои Фонди авруосиёии муътадилгардонӣ ва рушд барои дастгирии Буҷети давлатӣ дар шароити пандемияи COVID-19 байни Ҷумҳурии Тоҷикистон ва Бонки авруосиёии рушд мавриди баррасӣ қарор гирифт.
Файзиддин Қаҳҳорзода, вазири молияи Ҷумҳурии Тоҷикистон, созишномаи мазкурро муаррифӣ намуда, изҳор дошт, ки он дар шароити вазнини иқтисодиву молиявии ҷаҳонӣ, ки бо сар задани пандемияи COVID-19 ба миён омадааст, барои ҳаллу фасли мушкилоти молиявии давлат, таъмини музди меҳнат, уҳдадориҳои иҷтимоии давлат тавассути дастгирии Буҷети давлатӣ мебошад. Маблағи созишнома 50 миллион доллари амрикоиро ташкил медиҳад.
Инчунин, Созишнома оид ба ҳамкории давлатҳои иштирокчии Иттиҳоди Давлатҳои Мустақил дар соҳаи пешгирӣ ва рафъи ҳолатҳои фавқулода баррасӣ шуд. Вобаста ба он, Рустам Назарзода, раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон, иброз намуд, ки созишномаи мазкур бо мақсади таҳкими ҳамкорӣ дар соҳаи пешгирӣ ва рафъи ҳолатҳои фавқулода дар ИДМ мусоидат менамояд.
Дар идомаи ҷаласа Шараф Шерализода, муовини якуми раиси Кумитаи давлатии сармоягузорӣ ва идораи амволи давлатӣ ва Гулбаҳор Назирӣ, вакили Маҷлиси намояндагон, зимни баррасии Созишномаи қолабӣ байни Ҳукумати Ҷумҳурии Тоҷикистон ва Корпоратсияи байналмилалии исломӣ оид ба маблағгузории тиҷорат (ITFC) афзуданд, ки мақсади асосии созишнома барои рушди равобити тиҷоратии кишварҳои аъзои Созмони ҳамкории исломӣ тавассути пешниҳоди маблағҳо барои тиҷорат ва иштирок дар фаъолияти байнибонкӣ, тиҷоратӣ, инчунин, мусоидат дар таҳкими савдои байналмилалӣ мебошад.
Маблағгузорӣ, асосан, барои рушди тиҷорат ва таъмини бозори истеъмолӣ бо маҳсулоти аввалиндараҷа равона мегардад. Тибқи созишнома корпоратсияи мазкур мақсад дорад, ки дар се соли минбаъда барои Ҷумҳурии Тоҷикистон 150 миллион доллари амрикоиро бе кафолати давлатӣ (ба истиснои корхонаю ташкилотҳои давлатӣ) ҷиҳати маблағгузории соҳаҳои болозикр амалӣ намояд.
Лашкар ШАРИФЗОДА,
«Ҷумҳурият»
Баёни ақида (0) Санаи нашр: 09.10.2020 №: 199 - 200 Мутолиа карданд: 8874
