иқтисод
«РУШДИ ЧОРВОДОРӢ ВА ЧАРОГОҲҲО». ТАҚДИМИ 26 ТРАКТОРИ НАВ БА ИСТИФОДАБАРАНДАГОНИ ЧАРОГОҲ
Чанде пеш дар доираи татбиқи марҳилаи дуюми лоиҳаи «Рушди чорводорӣ ва чарогоҳҳо» Муассисаи давлатии «Маркази идораи лоиҳаи «Рушди чорводорӣ ва чарогоҳҳо» ба кишоварзони шаҳру ноҳияҳои пилотӣ - Восеъ, Фархор, Мир Сайид Алии Ҳамадонӣ ва Кӯлоб 26 трактори нави тамғаи МТЗ 80/Х, МТЗ 82/1, МТЗ 892/2 тақсим намуд. Иқдоми мазкур бо мақсади бо техника ва мошинолоти нави кишоварзӣ таъмин кардани аҳолии деҳот ва ба ин васила қонеъ гардондани эҳтиёҷоти ҷамъиятҳои истифодабарандагони чарогоҳҳо рӯи кор омад.
Ба гуфтаи Абдулаҳад Хоҷазода, директори Муассисаи давлатии «Маркази идораи лоиҳаи «Рушди чорводорӣ ва чарогоҳҳо», норасоии техника ва мошинолоти кишоварзӣ яке аз мушкилиҳои асосии кори деҳқон аст, ки бо дастгирии Ҳукумати Ҷумҳурии Тоҷикистон ва Фонди байналмилалии рушди кишоварзӣ (ФБРК) тадриҷан бартараф шуда истодааст.
- Сатҳу сифати кишт ва натиҷаи заҳмати деҳқон аз ҳолати техника вобастагии калон дорад. Бо ҳидояти Пешвои муаззами миллат ҷамъиятҳои истифодабарандагони чарогоҳҳо бо техникаю мошинолоти муосири кишоварзӣ дастрасӣ ёфта, фаъолияташонро боз ҳам васеътар менамоянд, - гуфт Абдулаҳад Хоҷазода.
Абдусаттор Одинаев, раиси ҷамъияти истифодабарандагони чарогоҳи «Миропоқ» - и деҳоти Даҳанаи шаҳри Кӯлоб, гуфт, ки бо дастгирии Ҳукумати Ҷумҳурии Тоҷикистон, «Маркази идораи лоиҳаи «Рушди чорводорӣ ва чарогоҳҳо» ва Фонди байналмилалии рушди кишоварзӣ соҳиби техникаи нави кишоварзӣ шудем ва дар корҳои хоҷагӣ аз онҳо васеъ истифода бурда, мушкилии чандсоларо аз байн мебарем. Техникаҳо барои корҳои саҳроӣ ёрӣ расонда, ба рушди чорводорӣ мусоидат менамоянд.
Дастрасӣ ба техника ва мошинолоти кишоварзӣ имкон медиҳад, ки сол то сол нишондиҳандаҳои истеҳсолӣ зиёд карда шаванд. Маҳз бо ин мақсад 26 техникаи нави кишоварзӣ ба ҷамъиятҳои истифодабарандагони чарогоҳҳои ноҳияҳои зерҳадафи лоиҳа тақдим гардид. Дар самти дастгирии рушди соҳа боз як қатор нақшаҳо таҳрезӣ гардидаанд, ки дар доираи чунин лоиҳа ва барномаҳои давлатӣ амалӣ мешаванд.
Муассисаи давлатии «Маркази идораи лоиҳаи «Рушди чорводорӣ ва чарогоҳҳо» бо дастгирии Ҳукумати ҷумҳурӣ аз ҷониби Фонди байналмилалии рушди кишоварзӣ (ФБРК) маблағузорӣ мегардад. Ҳадафи асосии лоиҳаи «Рушди чорводорӣ ва чарогоҳҳо - II» мусоидат ба боло рафтани сатҳи зиндагии чорводорони ноҳияҳои фарогир мебошад.
Кароматулло АТО,
«Ҷумҳурият»
Баёни ақида (0) Санаи нашр: 09.10.2020 №: 199 - 200 Мутолиа карданд: 856
