сиёсат
ЭМОМАЛӢ РАҲМОН БО 90,92 ДАРСАД РАЪЙИ МАРДУМ ДАР ИНТИХОБОТ ПИРӮЗ ШУДАНД
Номзад ба мансаби Президенти Ҷумҳурии Тоҷикистон аз Федератсияи иттифоқҳои касабаи мустақили Тоҷикистон, Иттифоқи ҷавонони Тоҷикистон ва Ҳизби Халқии Демократии Тоҷикистон Эмомалӣ Раҳмон бо гирифтани 90,92 дарсади овозҳо дар интихоботи Президенти Ҷумҳурии Тоҷикистон пирӯз эълон шуданд.
Дар ин бора Бахтиёр Худоёрзода, раиси Комиcсияи марказии интихобот ва раъйпурсии Ҷумҳурии Тоҷикистон, зимни эълони натиҷаҳои пешакии интихобот дар ҳузури доираи васеи мушоҳидони милливу байналмилалӣ ва хабарнигорон хабар дод.
Аз рӯи маълумоти Комиссияи марказии интихобот ва раъйпурсӣ, дар интихоботи Президенти Ҷумҳурии Тоҷикистон ба тарафдории номзадҳо аз Ҳизби аграрии Тоҷикистон Рустам Латифзода 127 ҳазору 746 нафар (3,03 дарсад), Ҳизби ислоҳоти иқтисодии Тоҷикистон Рустам Раҳматзода 90 ҳазору 587 нафар (2,15 дарсад), Ҳизби коммунисти Тоҷикистон Мироҷ Абдуллоев 49 ҳазору 212 нафар (1,17 дарсад), Ҳизби сотсиалистии Тоҷикистон Абдуҳалим Ғаффоров 62 ҳазору 853 нафар (1,49 дарсад), аз Федератсияи иттифоқҳои касабаи мустақили Тоҷикистон, Иттифоқи ҷавонони Тоҷикистон ва Ҳизби Халқии Демократии Тоҷикистон Эмомалӣ Раҳмон 3 миллиону 837 ҳазору 927 нафар (90,92 дарсад) овоз додаанд.
Иттилоъ дода шуд, ки дар ҷумҳурӣ 68 ҳавзаи интихоботӣ ва 3375 участка, инчунин, 39 участкаи интихоботӣ дар хориҷи кишвар ташкил шуда буд. Шумораи интихобкунандагон 4 943 289 нафар ва шумораи онҳое, ки бори аввал овоз медиҳанд, 105 399 нафарро ташкил дод.
Дар интихоботи президентӣ тибқи натиҷаҳои пешакии ҳисоби овозҳо 4 миллиону 221 ҳазору 76 нафар (85,39 дарсад) интихобкунанда иштирок кард.
Лашкар ШАРИФЗОДА, «Ҷумҳурият»
Баёни ақида (0) Санаи нашр: 12.10.2020 №: 201 - 202 Мутолиа карданд: 613
