ҳуқуқ
ПРОКУРАТУРАИ СУҒД. ҚАРИБ 200 МИЛЛИОН СОМОНӢ ЗАРАР БАРҚАРОР ШУД
- Тайи нуҳ моҳи соли равон ба прокуратураи вилояти Суғд 8250 муроҷиат ворид гардида, аз ин 2 ҳазору 496 адад аз ҷониби кормандони прокуратураи шаҳру навоҳии вилоят баррасӣ ва 536 муроҷиат қонеъ шудааст. Баҳри бартараф намудани қонунвайронкуниҳо ва баррасии масъулияти шахсони гунаҳгор 255 санади эътиноӣ оварда, 246 қарори ғайриқонунии мақомоти таҳқиқу тафтиш бекор, инчунин, 88 парвандаи маъмурӣ ва 48 парвандаи ҷиноятӣ оғоз гаштааст.
Ин нуктаро Ҳабибулло Воҳидов, прокурори вилоят Суғд, дар ҷаласаи ҳайати мушовараи прокуратураи вилоят иброз дошт.
Ӯ гуфт, ки дар самтҳои назорати умумӣ қонунгузориҳо оид ба замин, андозу гумрук, фаъолияти соҳибкорӣ ва сармоягузорӣ, бонкдорӣ, муроҷиатҳо, ҳифзи ҳуқуқи истеъмолкунандагон, ҳифзи амволи давлатию шахсӣ, маориф, масъулияти падару модар дар таълиму тарбияи фарзанд, шаҳрсозию меъморӣ, танзиму назорати асъор, анъана ва ҷашну маросим ва дигар қонунгузориҳо 1249 санҷиш гузарондаанд. Дар натиҷа, 8167 санади эътиноӣ ба тасвиб расида, 12 ҳазору 605 нафарро ба ҷавобгариҳои интизомӣ, моддӣ ва маъмурӣ кашида, ҳамчунин, 728 парвандаи ҷиноятӣ оғоз гардид.
- Мақомоти прокуратураи вилоят дар ҳамаи самтҳои назорат муваффақ гашта, дар 9 моҳи соли ҷорӣ 199,8 миллион сомонӣ зарари моддиро барқарор намудааст: 102,1 миллион ба буҷет ва 97,7 миллион ба корхонаю шаҳрвандон, - гуфт Ҳ. Воҳидов.
Зикр гардид, ки яке аз масъалаҳои умдаи кишвар қонунгузории замин буда, дар ин самт назорат пурзӯр гаштааст. Пас аз санҷишҳо прокуророни вилоят 157 парвандаи ҷиноятӣ оғоз карда, 4340 гектар қитъаи замини худсарона ишғолшударо ба ҳолати аввала баргардонда, ба 239 қарори раисони шаҳру ноҳияҳо эътироз оварданд.
Прокурори вилоят дар иртибот ба воридшавии маҳсулот аз ҷониби соҳибкорон ҳарф зада, иброз дошт, ки сифати маҳсулоти воридшуда, хосса маводи доруворӣ, зери назорати ҷиддии мақомоти прокуратура қарор дорад. Масалан, дар давраи ҳисоботӣ 48 ҳолати ба фурӯш баровардани дорувории муҳлати истеъмолаш гузашта ва бе сертификат ошкор гардида, қариб чоруним ҳазор адад доруворӣ аз муомилот бароварда, нисбат ба 121 нафар парвандаҳои маъмурӣ ва ҷиноятӣ оғоз шудаанд.
Вазъи иҷрои қонунгузории андоз санҷида шуда, бо 871 амри прокурорӣ 100 миллион сомонӣ маблағи андозҳо ба буҷет ворид ва 21 парвандаи ҷиноятӣ оғоз гардидааст.
Дар самти назорати иҷрои қонунгузориҳои нақлиёт ва гумрук 642 ҳолати қочоқи молу маҳсулот ба маблағи 3,5 миллион сомонӣ ошкор гардида, шахсони гунаҳгор ба маблағи 2,3 миллион сомонӣ ҷарима ва 1,2 миллион сомонӣ молу маҳсулот ба манфиати давлат мусодира гардид.
Таҳлили вазъи ҷинояткорӣ нишон дод, ки дар ин давра 4368 ҷиноят сабт шуда, 89,8 дарсади он ошкор гардидааст
Ҷовиди АШТӢ, «Ҷумҳурият»
Баёни ақида (0) Санаи нашр: 14.10.2020 №: 204 Мутолиа карданд: 548
