ҳуқуқ
ҶИНОЯТ ВА ҶАЗО
ОДАМКУШӢ
Зан шавҳарашро бо табар ба қатл расонд
Вазорати корҳои дохилӣ аз боздошти зани 40 - солае хабар дод, ки дар қатли ҳамсараш гумонбар дониста мешавад.
Бино ба иттилои манбаъ, ин зан сокини Ҷамоати деҳоти Қалъачаи калони шаҳри Истаравшан буда, бар асари як муноқиша шавҳарашро бо зарби табар ба ҳалокат расондааст.
Ҳодисаи хунин 12 октябри соли ҷорӣ дар манзили зисташон ба амал омада, ҳоло мавриди тафтишот қарор дорад.
БИЛЕТИ ҲАРБИИ ҚАЛБАКӢ
ронандаи ҷамоат ва масъули комиссариати ҳарбиро ба суд кашид
Агентии назорати давлатии молиявӣ ва мубориза бо коррупсияи Ҷумҳурии Тоҷикистон парвандаи ҷиноятӣ нисбат ба Рустам Буйдаков ва Файзиддин Каримовро, ки даст ба фурӯши билетҳои ҳарбии қалбакӣ заданд, баъд аз анҷоми тафтиши пешакӣ ба суд ирсол намуд.
Маркази матбуоти агентӣ хабар медиҳад, ки Рустам Буйдаков, ронандаи Ҷамоати деҳоти Султонободи ноҳияи Рӯдакӣ, дар ҳамоҳангӣ бо сардори зершуъбаи комиссариати ҳарбии ноҳия Файзидин Каримов моҳи феврали соли 2020 аз шаҳрванд «А» барои ба номи бародараш омода карда додани билети ҳарбии номувофиқ ба хизмати ҳарбӣ 8000 сомонӣ талаб карда, онро дар ду ҳолат гирифта, бар ивазаш билети ҳарбии қалбакӣ доданд. Инчунин, онҳо бо ҳамин тарзу усул моҳи июни соли 2020 ба номи шаҳрванд «Б» билети ҳарбии номувофиқ ба хизмати ҳарбиро бо роҳи сохтакорӣ омода карда доданд.
МОШИНДУЗДӢ
Ҳеҷ амали ғайриқонунӣ бе ҷавобгарӣ намемонад
Бонуи 34-солае, ки 9 октябри соли ҷорӣ нақлиёти мусофирбари ширкати «Сафар Ориён»-ро аз кӯчаи Неъмат Қарабоеви шаҳри Душанбе рабуда буд, фавран аз сӯи кормандони милитсия дастгир шуд.
Ин хабарро сомонаи ВКД нашр карда, навишт, ки ин зан муваққатан дар Душанбе зиндагӣ карда, зимни ғайриқонунӣ рондани воситаи нақлиёт дар назди мағозаи «Гулистон», воқеъ дар кӯчаи Н. Қарабоев боздошт гардид.
Ҳоло дар робита ба ин ҳодиса тафтишот идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 14.10.2020 №: 204 Мутолиа карданд: 806
