иқтисод
СТАНДАРТҲО. КАФОЛАТИ БЕХАТАРӢ ВА ХУШИИ ЗИНДАГӢ
14 октябр ҳамасола дар ҷаҳон ҳамчун Рӯзи байналмиллалии стандартҳо ҷашн гирифта мешавад.
Зиндагӣ, ҳаёти ҳаррӯза ва табиат ҳам, стандартҳои худро доранд. Табиист, ки ҳар гуна ашёи аз стандарт, яъне аз қолабу меъёри муайян берун сохташуда дар рӯзгори ҷомеа роҳ намеёбад. Ана ҳамин ҳадду қолиб аст, ки одаму оламро зеботар нишон медиҳад ва ҳатто то андозае ҳаётро ширину рангин месозад, яъне ороишгари рӯзгор маҳсулоти стандартӣ аст.
Стандартҳо дастрасии ҳар як шахсро ба маҳсулот, сохтор ва хизматрасониҳо осон менамоянд. Онҳо дар худ талаботи бехатарӣ, меҳнатшиносӣ ва усулҳои мувофиқашудаи ҳамаи ташхисҳоро, ки ба тавсеаи дастрасӣ равона шудаанд, дарбар мегиранд, ҳамчунин, барои паҳн намудани навовариҳои технологӣ дар кишварҳои мутараққӣ ва мамлакатҳои дар ҳоли рушдбуда мусоидат намуда, барои рушди бозор ва тараққиёти савдои ҷаҳонӣ кӯмак мерасонанд.
Имрӯз бамеъёрдарории техникӣ ва стандартонӣ яке аз равандҳои ҳамкориҳои мустаҳками давлат ва институтҳои ғайридавлатӣ, иттиҳодияҳои тиҷоратӣ, муассисаҳои илмӣ ва ташкилотҳои ҷамъиятии давлатҳои пешрафта мебошад. Дар системаи бамеъёрдарории техникӣ стандартҳо нақши асосӣ доранд. Стандартҳо бехатарии мол, кор ва хизматрасониро дар бозори дохилӣ таъмин намуда, нақши «муҳаррики савдоро» иҷро мекунанд, ҳамчунин, механизми фаъоли банизомдарории соҳаи иҷтимоӣ ба ҳисоб мераванд. Ғайр аз ин, мустақиман ба савдои хориҷӣ таъсир расонда, монеаҳои техникиро дар вақти дастрас намудани маҳсулот ба бозор кам менамоянд. Тибқи маълумот, 80 дарсади савдои ҷаҳонӣ аз стандартҳо вобастагӣ дорад.
Ҳамин тариқ, таҷрибаи ҳуқуқӣ ва банизомдарории техникӣ нишон медиҳад, ки дар давлатҳои пешрафта мақомоти давлатӣ дар соҳаи таъмини бехатарии аҳолӣ, ҳифзи манфиатҳо ва ҳуқуқи истеъмолкунандагон, ҳифзи муҳити зист, баланд бардоштани рақобатпазирии иқтисодиёти миллиро бо риояи татбиқи қонунгузориҳо фаъолона ба роҳ мондаанд.
Агентии «Тоҷикстандарт» мақомоти миллии соҳаи стандартонии Ҷумҳурии Тоҷикистон ба шумор рафта, нақши он дар таъмини амнияти иқтисодии кишвар калон аст. «Тоҷикстандарт» дар созмонҳои байналмилалии соҳаи стандартикунонӣ Тоҷикистонро муаррифӣ намуда, айни замон узви вобастаи ташкилоти байналмилалӣ оид ба стандартҳо (ИСО), узви Шӯрои байнидавлатии ИДМ оид ба стандартизатсия, метрология ва сертификатсия, узви вобастаи Ташкилоти байналмилалии метрологияи қонунгузор, узви комилҳуқуқи Созмони ҳамкории Авруосиёии муассисаҳои давлатии метрологӣ, Ташкилоти байналмилалии стандартизатсия, Созмони байналмилалӣ оид ба ҳамкорӣ дар соҳаи аккредитатсияи озмоишгоҳҳо ва Созмони Осиёи Марказӣ оид ба стандартизатсия, метрология ва сертификатсия дар соҳаи метрология, ваколатдиҳӣ ва сертификатсия мебошад. Кормандони мақомот дар фаъолияти ҳаррӯза қонунҳои амалкунандаи соҳа, риояи стандартҳо ва ҳимояи ҳуқуқи истеъмолкунандагонро, ки дар маҷмӯъ ба баланд бардоштани сатҳу сифати зиндагии мардум нигаронда шудаанд, бо масъулияти том татбиқ менамоянд.
Сиёсати иқтисодии имрӯзаи Ҳукумати Ҷумҳурии Тоҷикистон дар робита ба узвият ба Созмони ҷаҳонии савдо (СҶС) дар такя ба иқтисодиёт ва савдои ҷаҳонӣ ба роҳ монда шудааст. Дар ин самт дар Ҷумҳурии Тоҷикистон пойгоҳи меъёрӣ - ҳуқуқӣ такмил дода, барои ба сатҳи ҷаҳонӣ баровардани иқтисодиёти миллӣ аз тарафи давлат тадбирҳои судманд андешида шудаанд. Бе истифодаи воситаҳои бамеъёрдарории техникӣ баланд бардоштани манфиатҳои иқтисодӣ имконнопазир аст. Стандартҳо яке аз нишонаҳои тамаддуни ҷаҳонӣ ба ҳисоб рафта, дар марҳилаи ҳозира барои ташаккули фалсафаи сифати ҳаёт хизмат менамоянд.
Матлубаи АБДУҚАҲҲОР,
“Ҷумҳурият”
Баёни ақида (0) Санаи нашр: 15.10.2020 №: 205 - 206 Мутолиа карданд: 620
