ҳуқуқ
АЗ ДУ ТО ПАНҶ СОЛИ ҲАБС. МЕЪЁРИ НАВИ КОДЕКСИ ҶИНОЯТӢ ДАР БОРАИ БАРАНГЕХТАНИ НИЗОИ ИҶТИМОӢ
Минбаъд ҳаракатҳое, ки барои барангехтани кинаю адоват ё низои иҷтимоӣ, нажодӣ, миллӣ, маҳалгароӣ ё динӣ (мазҳабӣ), паст задани шаъну эътибори нажодӣ, миллӣ, динӣ (мазҳабӣ) ё маҳал, инчунин, тарғиби махсусият ва бартарии шаҳрвандон аз нигоҳи муносибати онҳо ба дин (мазҳаб), забон, мансубият ба нажод, миллат ё маҳал равона шудаанд, ҷавобгарии ҷиноятӣ хоҳанд дошт. Агар ин кирдорҳо ба таври оммавӣ ё бо истифодаи воситаҳои ахбори омма ё шабакаҳои алоқаи барқӣ, аз ҷумла интернет, дар давоми соли пас аз татбиқи ҷазои маъмурӣ барои чунин ҳуқуқвайронкуниҳо содир шуда бошанд, дар ин сурат айбдоршавандаро аз ду то панҷ соли зиндон таҳдид мекунад.
Ин тағйирот дар ҷаласаи навбатии Маҷлиси намояндагони Маҷлиси Олӣ баррасӣ шуд. Лоиҳаи Қонуни Ҷумҳурии Тоҷикистон «Дар бораи ворид намудани тағйир ба Кодекси ҷиноятии Ҷумҳурии Тоҷикистон» - ро Ашуриён Музаффар, вазири адлияи Ҷумҳурии Тоҷикистон, муаррифӣ намуда, изҳор дошт, ки лоиҳаи қонуни мазкур бо мақсади иҷрои супориши Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки 28 декабри соли 2017 зимни вохӯрӣ бо кормандони мақомоти амнияти миллӣ баён доштанд, ҷиҳати ба роҳ мондани усулҳои пешгирикунандаи муқовимат ба экстремизм тавассути татбиқи ҷазои маъмурӣ ва огоҳкунии расмии шаҳрвандон таҳия шудааст. Дар идомаи ҷаласаи Маҷлиси намояндагон вакилон лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи аудити дохилӣ дар ташкилотҳои бахши давлатӣ» - ро мавриди баррасӣ қарор доданд.
Санади мазкурро Файзиддин Қаҳҳорзода, вазири молияи Ҷумҳурии Тоҷикистон, муаррифӣ карда, гуфт, ки лоиҳаи қонуни мазкур ҷиҳати таҳия ва тасдиқи Стандартҳои миллии аудити дохилӣ ва Кодекси одоби касбии аудиторони дохилӣ бо назардошти дар қонуни амалкунанда мавҷуд набудани талабот вобаста ба онҳо, ки салоҳиятҳои мақоми ваколатдорро муайян менамояд, таҳия ва пешниҳод гардидааст.
Зимни баррасии лоиҳаи Қонуни Ҷумҳурии Тоҷикистон «Дар бораи ворид намудани илова ба Кодекси ҳуқуқвайронкунии маъмурии Ҷумҳурии Тоҷикистон» вазири адлияи Ҷумҳурии Тоҷикистон Ашуриён Музаффар таъкид намуд, ки лоиҳаи қонуни мазкур бо истифода аз ҳуқуқи ташаббуси қонунгузорӣ аз ҷониби Ҳукумати Ҷумҳурии Тоҷикистон пешниҳод гардидааст. Ҳамзамон, лоиҳа дар ҳамбастагӣ ба лоиҳаи Қонуни Ҷумҳурии Тоҷикистон «Дар бораи ворид намудани тағйир ба Кодекси ҷиноятии Ҷумҳурии Тоҷикистон» таҳия гардида, барои татбиқи ҷавобгарии маъмурӣ нисбат ба кирдори шахсе, ки ҳангоми набудани аломати ҷиноят дар кирдораш муқаррар мекунад, таҳия шудааст.
Лашкар ШАРИФЗОДА, «Ҷумҳурият»
Баёни ақида (0) Санаи нашр: 19.10.2020 №: 207 Мутолиа карданд: 1072
