иқтисод
ХАТЛОН. БАРДОШТ АЗ НУҲ МОҲЕ, КИ ГУЗАШТ
Таҳти раёсати Қурбон Ҳакимзода, раиси вилояти Хатлон, нишондиҳандаҳои нуҳмоҳаи иқтисодию иҷтимоии вилоят натиҷагирӣ шуданд. Зикр гардид, ки новобаста аз мавҷудияти камбудиҳои ҷузъӣ дар баъзе самтҳо, дар соҳаҳои муҳими хоҷагии халқ пешравиҳои зиёд ба мушоҳида мерасанд. Дар ин бора ба хабарнигори «Ҷумҳурият» Носирҷон Маъмурзода, мудири шуъбаи иттилоотию таҳлилии дастгоҳи раиси вилоят, хабар дод.
Абдуалим Исмоилзода, муовини якуми раиси вилоят, гуфт, ки иҷрои нақшаи андозҳо бо назардошти андози иҷтимоии ғайрибуҷетӣ дар ин давра 100,7 дарсад иҷро шуда, ба буҷет 1109,4 миллион сомонӣ ворид гардид, ки нисбати нақша 7,2 миллион сомонӣ зиёд аст. Нақшаи андозҳо 101,7 дарсад таъмин шуд.
- Бонкҳои вилоят ба соҳаҳои иқтисодӣ 1131,4 миллион сомонӣ қарз додаанд, ки назар ба ҳамин давраи соли гузашта 137,2 миллион сомонӣ (13,8 дарсад) зиёд мебошад. Аз ин ҳисоб ба соҳаҳои кишоварзӣ 341,2 миллион (30,2 дарсад), саноат, сохтмон ва нақлиёт 337,3 миллион (29,8 дарсад), савдо 257,6 миллион (22,8 дарсад), рушди сайёҳӣ ва ҳунарҳои мардумӣ 8,4 миллион (0,7 дарсад) ва дигар соҳаҳо 186,9 миллион сомонӣ (16,5 дарсад) қарз дода шудааст, - гуфт Абдуалим Исмоилзода.
Дар нуҳ моҳ гардиши савдои хориҷӣ ба 217,2 миллион доллари амрикоӣ расид. Содироти мол 100,9 миллион долларро ташкил дода, воридоти он ба 116,3 миллион доллар расидааст.
Дар давраи ҳисоботӣ дар ҳудуди вилоят 36 ҳазору 204 ҷойи нави кори доимӣ ва мавсимӣ таъсис ёфт. Аз ҳисоби 302 ярмаркаи ҷойҳои кории холии баргузоршуда 3 ҳазору 270 шаҳрванд бо ҷойи кор таъмин гардид. Дар умум, 5 ҳазору 308 нафар бо шуғл фаро гирифта шуд.
Аз вилоят ба хориҷи кишвар, асосан, нахи пахта, калобаи ресандагӣ, неруи барқ, семент, шираи камол, ангишт ва маҳсулоти кишоварзӣ содирот гардида, нурии минералӣ, маҳсулоти нафтӣ, гази моеъ, воситаҳои нақлиёт, маҳсулоти кишоварзӣ, тиббӣ, шакар ва дигар анвои маҳсулот ворид шудааст.
Ҳаҷми истеҳсоли маҳсулоти саноатӣ ба 6007,3 миллион сомонӣ расид, ки дар қиёс ба ҳамин давраи соли гузашта 230,6 миллион сомонӣ зиёд мебошад. Ҳоло дар вилоят 90 номгӯи маҳсулоти саноатӣ истеҳсол мешавад. Дар ҳаҷми умумии истеҳсоли маҳсулоти саноатӣ ҳиссаи саноати коркард 44,2 дарсад, истихроҷи маъдан 3,6 дарсад, истеҳсоли неруи барқ 51,7 дарсад ва хизматрасонии об 0,6 дарсадро ташкил дод.
Дар интиҳои ҷаласа Қурбон Ҳакимзода ба раисони шаҳру ноҳияҳо ва масъулони ташкилоту муассисаҳои дахлдори вилоятӣ ва минтақавӣ оид ба ҷамъоварии саривақтӣ ва беталафи ҳосили пахта, коҳиши ҳаҷми бақияпулии андоз, пардохти саривақтии маошу нафақапулиҳо, ташвиқу тарғиби ҷавонон ба адои хизмати ҳарбӣ, пешгирӣ аз ҷинояткорӣ, ба таҳсил дар муассисаҳои таълимӣ фаро гирифтани кӯдакону наврасони синни мактабӣ, тақвияти корҳои ободонию созандагӣ, қабули шаҳрвандон ва чораандешӣ нисбат ба муроҷиати онҳо, омодагии ҷиддӣ ба мавсими сармо ва дигар масъалаҳои мавриди назар дастуру супоришҳои мушаххас дод.
Кароматулло АТО,
«Ҷумҳурият»
Баёни ақида (0) Санаи нашр: 20.10.2020 №: 208 Мутолиа карданд: 1022
