иқтисод
ФАЙЗОБОД. ВУСЪАТИ КОРҲОИ СОЗАНДАГӢ
Имрӯзҳо дар ноҳияи Файзобод корҳои созандагиву бунёдӣ босуръат идома доранд ва ҳар нафаре, ки вориди ноҳия мегардад, ин дигаргуниҳоро баръало мушоҳида мекунад. Мардуми заҳматпешаву заҳматқарини ноҳия ин ҳамаро аз шарофати сиёсати хирадмандона ва ташаббусу иқдомҳои созандаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон медонанд.
Зеро маҳз дар даврони соҳибистиқлолии кишвари азизамон ноҳия намои тоза касб карда, тамоми соҳаҳои хоҷагии халқ ривоҷу равнақ пайдо карданд. Пулу роҳҳои ҳамвору мумфарш, кӯчаву гулгаштҳо, корхонаҳои саноативу муассисаҳои таълимӣ, марказҳои хизматронӣ ва иншооти хуштарҳу замонавиаш далели ин гуфтаҳоянд.
Сокинони ноҳияи Файзобод аз мулоқоти Сарвари давлат муҳтарам Эмомалӣ Раҳмон, ки моҳи сентябри соли гузашта ба вуқӯъ пайваста буд, рӯҳу илҳоми тоза гирифта, бо ҳисси баланди ватандӯстӣ баҳри рушди соҳаҳои гуногуни хоҷагии халқ дастаҷамъона саъю кӯшиш доранд. Бахусус, соҳибкорону шахсони саховатпеша барои ободу зебо гардондани як гӯшаи Ватан саҳми арзандаи худро мегузоранд. Тавре аз мақомоти иҷроияи маҳаллии ҳокимияти давлатии ноҳия хабар доданд, соҳибкорон ва мардуми саховатманди ноҳияи Файзобод барои дар сатҳи баланд пешвоз гирифтани Ҷашни 30-солагии Истиқлолияти давлатии Ҷумҳурии Тоҷикистон камари ҳиммат бастаанд. Бо дастгирии онҳо соли равон беш аз 45 иншооти таъйиноташон гуногун ба истифода дода шуд. Масалан, муассисаи таҳсилоти миёнаи умумии № 26 дар деҳоти Заркамар, бунгоҳи тиббӣ дар деҳоти Шаҳтакиён, Доров ва Сайдонӣ, сехи дӯзандагӣ дар деҳоти Заркамар, синфхонаҳои иловагӣ дар назди муассисаҳои таълимии №№ 19, 31, 42 ва маркази хизматрасониҳо дар марказ ва деҳот аз ҷумлаи онҳоянд.
Ҳоло бошад, аз ҳисоби буҷети маҳаллӣ ва саҳми соҳибкорону шахсони саховатпеша дар деҳоти Мискинобод бунёди беморхонаи бемориҳои сироятӣ бомаром идома дорад.
Маврид ба зикр аст, ки айни ҳол ба сохтмони он беш аз 20 сокини маҳаллӣ ҷалб шудааст. Тибқи лоиҳа, беморхона дорои 17 ҳуҷра хоҳад буд ва баъди бунёди он 30 нафар ба ҷои кори доимӣ таъмин мегардад.
З. РАҶАБ, “Ҷумҳурият”
Баёни ақида (0) Санаи нашр: 20.10.2020 №: 208 Мутолиа карданд: 574
