сиёсат
МУЛОҚОТИ ЭМОМАЛӢ РАҲМОН БО КЕННЕТ Ф. МАККЕНЗИ
22 октябр мулоқоти Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон Эмомалӣ Раҳмон бо фармондеҳи Фармондеҳии марказии Қувваҳои Мусаллаҳи ИМА генерал Кеннет Ф. Маккензи, ки бо сафари корӣ боздид аз Тоҷикистон анҷом медиҳад, баргузор гардид.
Дар рафти мулоқот як қатор масъалаҳои ҳамкориҳои Тоҷикистону Иёлоти Муттаҳидаи Амрико, бахусус дар соҳаи амният, баррасӣ гардиданд.
Зимнан, ба мавзӯъҳои мубрами таъмини сулҳу суботи минтақавӣ ва хатару таҳдидҳои глобалии амниятӣ таваҷҷуҳи хоса зоҳир шуд.
Ҷонибҳо, ҳамчунин, атрофи вазъи кунунӣ ва раванди музокироти сулҳ дар Афғонистон мубодилаи афкор намуданд.
Вобаста ба ин, Пешвои миллат боз ҳам таъкид доштанд, ки ҷараёни рушди вазъият дар Афғонистони ҳамсоя пайваста дар маркази диққати ҷониби мо қарор дорад ва Тоҷикистон аз талошҳои Ҳукумати Афғонистон дар самти истиқрори сулҳу суботи пойдор дар кишвар ҳамеша ҷонибдорӣ менамояд.
Ҳангоми суҳбат ҷонибҳо, ҳамчунин, роҷеъ ба дигар ҷанбаҳои муносибатҳои Тоҷикистону Иёлоти Муттаҳидаи Амрико ибрози ақида намуда, алоқамандиашонро ба таҳкиму тақвияти ҳамкориҳо дар самти муборизаи муштарак алайҳи хатару таҳдидҳои муосир, аз ҷумла терроризм, ифротгароӣ, гардиши ғайриқонунии маводи мухаддир ва дигар ҷиноятҳои муташаккили фаромиллӣ, таъкид карданд.
Баёни ақида (0) Санаи нашр: 23.10.2020 №: 210 Мутолиа карданд: 609
