ҳуқуқ
БАҲСИ КООПЕРАТИВӢ – ТИҶОРАТӢ. ЧАРО МАСЪУЛОН ҲАЛНОМАИ СУДРО ИҶРО НАМЕКУНАНД?
Соли 2003 бо қарори раиси ноҳияи Темурмалик (он вақт ноҳияи Совет) хоҷагии деҳқонии ба номи «Исмоили Сомонӣ» - ро таъсис дода, аз ҳамон сол сертификати ҳуқуқи истифодаи замин гирифтем. 1 июли соли 2016 хоҷагии деҳқонӣ шакли ташкилӣ - ҳуқуқӣ ва номи кооперативи тиҷоратии «Исмоили Сомонӣ С» - ро гирифт. Моҳи майи соли ҷорӣ намояндагони мақомоти иҷроияи маҳаллии ҳокимияти давлатии ноҳия, раис, муовин ва мутахассисони Ҷамоати деҳоти ба номи С. Раҳимов ба деҳаи Давад дар як ҷаласа кору фаъолияти моро печида карданд.
Дар маҷлис, ки чанде аз аъзои кооперативи тиҷоратии «Исмоили Сомонӣ С» низ ширкат доштанд, суратҷаласаи умумии саҳмдорони кооперативро тартиб дода, тибқи қарор маро аз вазифаи роҳбари кооперативи тиҷоратӣ озод намуда, то интихоб шудани роҳбари нав иҷрои вазифаро ба зиммаи раиси Ҷамоати деҳоти ба номи С. Раҳимов гузоштанд. Ин дар ҳолест, ки тибқи моддаи 6 Қонуни Ҷумҳурии Тоҷикистон «Дар бораи кооперативҳо» давлат ба риояи ҳуқуқ ва манфиатҳои қонунии кооперативҳо ва аъзои он кафолат дода, ба рушди кооперативҳо мусоидат менамояд. Давлат ва мақомоти давлатӣ наметавонанд ба фаъолияти кооперативҳо, ба истиснои ҳолатҳое, ки қонунгузор пешбинӣ кардааст, дахолат намоянд.
Сипас, дар асоси суратҷаласа мудири шуъбаи кишоварзии ноҳия фармоиш бароварда, маро аз вазифаи роҳбари кооператив озод намудааст. Ҳолатҳои мазкурро асос намуда, ба воситаи кормандони мақомоти ҳифзи ҳуқуқ маро маҷбур намуданд, ки муҳру ҳуҷҷатҳои кооперативро ба раиси ҷамоат супорам. Ноилоҷ онҳоро супурда, ба хотири муайян намудани он ки ин амалкард то куҷо қонунист, ба суди иқтисодии вилояти Хатлон муроҷиат намудам.
Суди иқтисодии вилоят ваҷҳҳои дар ариза овардаро бо иштироки ҷавобгарон баррасӣ намуда, даъвои маро қонеъ, амали ҷавобгаронро ғайриқонунӣ, фармоиши шуъбаи кишоварзӣ ва қарори қабулнамудаи маҷлиси умумии саҳмдорони кооперативро беэътибор донист. Вале аз чӣ бошад, ки то ҳол кормандони мақомоти иҷроияи маҳаллии ҳокимияти давлатии ноҳияи Темурмалик ҳалномаи баровардаи судро иҷро намекунанд?
Аз ин рӯ, мехоҳам аз минбари рӯзномаи бонуфузи кишвар - «Ҷумҳурият» ба таваҷҷуҳи мақомоти дахлдор муроҷиат намоям, то ба қазияи болозикр дахолат карда, кооперативро ба ман баргардонанд.
Абдугапар ЗОКИРОВ,
собиқ роҳбари кооперативи тиҷоратии
«Исмоили Сомонӣ С»
Баёни ақида (0) Санаи нашр: 23.10.2020 №: 210 Мутолиа карданд: 864
