ҳуқуқ
“КОРВОНИ ЗИДДИМУХАДДИРОТӢ - 2020”. ЧОРАБИНИҲО АЗ ИШКОШИМ ОҒОЗ ШУДАНД
Дар асоси нақшаи муштараки Агентии назорати маводи нашъаовари назди Президенти Ҷумҳурии Тоҷикистон ва Вазорати корҳои дохилӣ чорабиниҳои фарҳангию фароғатӣ ва варзишӣ таҳти унвони «Корвони зиддимухаддиротӣ - 2020» зери шиори “Якҷо бар зидди маводи нашъаовар мубориза мебарем”, бо ҷалби доираи васеи ҷавонону наврасони кишвар, аз 15 октябр то 15 ноябри соли 2020 дар шаҳру ноҳияҳои Вилояти Мухтори Кӯҳистони Бадахшон, вилоятҳои Хатлону Суғд ва шаҳри Душанбе доир мешавад.
Тавре аз Агентии назорати маводи нашъаовари назди Президенти Ҷумҳурии Тоҷикистон иттилоъ доданд, нахустин чорабинӣ дар ноҳияи Ишкошим доир гардид. Вохӯрии мазкур давоми ду рӯз бо гузарондани мусобиқаҳои варзишӣ, аз ҷумла волейбол, шашка ва шоҳмот, идома ёфта, дар онҳо ҷавонону наврасон ва дигар табақаҳои аҳолии ноҳия ҷалб шуданд. Мақсади баргузории чунин чорабинӣ аз дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва амалишавии Стратегияи миллии мубориза бар зидди гардиши ғайриқонунии маводи мухаддир дар Ҷумҳурии Тоҷикистон барои солҳои 2013 - 2020 сарчашма гирифта, ба тарзи ҳаёти солим, пешгирӣ ва коҳиш додани сатҳи нашъамандӣ равона гардидааст.
Дар чорабинӣ роҳбарияти мақомоти иҷроияи маҳаллии ҳокимияти давлатии ноҳияи Ишкошим, намояндагони мақомоти ҳифзи ҳуқуқ, варзишгарон ва ҷавонони фаъоли ноҳия иштирок ва суханронӣ намуданд.
Раиси ноҳия Мӯсо Мӯсозода, зимни баромади худ, иброз дошт, ки бо ҷонибдорӣ аз сиёсати пешгирифтаи Ҳукумати Ҷумҳурии Тоҷикистон ва иҷрои дастуру супоришҳои Пешвои миллат муҳтарам Эмомалӣ Раҳмон дар самти муқовимат бо муомилоти ғайриқонунии маводи нашъаовар ва пешгирии нашъамандӣ тамоми тадбирҳои мушаххасу мақсаднокро роҳандозӣ менамоянд. Зикр шуд, ки таъсири манфии ин зуҳуроти номатлуб метавонад ба тамоми табақаи ҷомеа зарари худро расонад.
Сардори шуъбаи назорати муомилоти маводи нашъаовар ва пешгирии нашъамандии агентии назорати маводи нашъаовар Бозоралӣ Сафарализода қайд намуд, ки бо ҷонибдорӣ аз сиёсати пешгирифтаи Ҳукумати кишвар дар самти мубориза бо муомилоти ғайриқонунии маводи нашъаовар, агентӣ ва дигар мақомоти дахлдор фаъолияти оштинопазири худро бар зидди қочоқ, интиқол ва паҳншавии маводи мухаддир, бахусус суистеъмоли онҳо ба роҳ монда, пайваста дар ин самт тадбиру чораҳои зарурӣ меандешад.
Инчунин, зикр шуд, ки мубориза бар зидди муомилоти ғайриқонунии маводи мухаддир ва пешгирии нашъамандӣ, ҳамкории дастаҷамъонаи ниҳодҳои масъули давлатиро тақозо менамояд, зеро хатари он ба тамоми қишрҳои ҷомеа таҳдид мекунад.
Зимни чорабинӣ, намояндагони насли наврас ва дигар шахсони масъул баромад намуда, оид ба зарар ва оқибатҳои ин маводи марговар, ибрози ақида намуданд. Дар интиҳо ба ғолибони мусобиқаҳои варзишӣ туҳфаҳои хотиравӣ тақдим гардид.
Ёдовар мешавем, ки ҳамоиши муштараки «Корвони зиддимухаддиротӣ - 2020» фарогири 14 шаҳру ноҳияҳои ҷумҳурӣ - Ишкошим, Хоруғ, Дарвоз, Шамсиддини Шоҳин, Кӯлоб, Мир Сайид Алии Ҳамадонӣ, Фархор, Панҷ, Шаҳритус, Бохтар, Панҷакент, Хуҷанд, Исфара ва Душанбе буда, дар ин шаҳру ноҳияҳо низ доир хоҳад шуд.
Сафаргул АЛИМОВА,
«Ҷумҳурият»
Баёни ақида (0) Санаи нашр: 02.11.2020 №: 214 Мутолиа карданд: 708