ҳуқуқ
КОНСТИТУТСИЯ ВА ҲОКИМИЯТИ СУДӢ
Конститутсия ҳамчун ҳуҷҷати дарбаргирандаи арзишҳои калидии ҷомеаву давлат ва марому мақсади халқи кишвар симои таърихӣ ва муосири Тоҷикистони азизро дар худ инъикос намуд.
Эмомалӣ РАҲМОН
Барҳақ, Конститутсияи Ҷумҳурии Тоҷикистон аз ҷиҳати мазмун, муҳтаво ва сохтор дар қатори беҳтарин конститутсияҳои ҷаҳон қарор гирифта, тавассути ин санад ҷомеаи ҷаҳонӣ ба хусусияти давлати мо ҳамчун мамлакати демокративу ҳуқуқбунёд ва иҷтимоӣ, таъриху фарҳанг, забон, сиёсати дохилию хориҷӣ, ҳифз ва кафолати ҳуқуқу озодиҳои инсон ва шаҳрванд, муносибати давлат ба моликият, ба тартиби таъсиси мақомоти олии ҳокимияти давлатӣ (қонунгузор, иҷроия ва судӣ) шиносоӣ пайдо кард.
Агар ба ибораи дигар гӯем, Конститутсия шиносномаи давлат ва халқи Тоҷикистон гардид. Узви СММ ва созмонҳои бонуфузи байналмилалии дунё будани Тоҷикистон, аз ҷониби беш аз 160 кишвар чун давлати соҳибистиқлол эътироф шудани он ва бо аксари мамлакатҳои ҷаҳон равобити дипломатӣ барқарор намуданаш, шаҳодати гуфтаҳои болоянд.
Ин санади олии ҳуқуқӣ ба таъсиси як қатор ниҳодҳои нави давлатдорӣ ва ҷомеаи демократӣ, аз ҷумла ҳокимияти судӣ, шароити мусоиди сиёсию ҳуқуқӣ фароҳам овард. Конститутсия ҳокимияти судиро мустақил эълон намуд, ки он аз номи давлат ва аз тарафи судяҳо амалӣ мегардад, ҳуқуқу озодиҳои инсон ва шаҳрванд, манфиати давлат, ташкилоту муассисаҳо, қонунияту адолатро ҳифз менамояд. Ин муқаррарот дар моддаи 84 рӯшан муайян шудааст.
Тибқи моддаи 87 бошад, судяҳо дар фаъолияти худ мустақил буда, танҳо ба Конститутсия ва қонун итоат мекунанд. Дахолат ба фаъолияти онҳо манъ аст.
Бар замми ин, барои ба сатҳи ҳокимият ва меъёрҳои эътирофшудаи байналмилалӣ расидани ҳокимияти судӣ дар мамлакат чор барномаи ислоҳоти судӣ-ҳуқуқӣ қабул гардид.
Ҳамин тариқ, давлат ва роҳбарияти сиёсии Тоҷикистон садоқати худро ба арзишҳои эътирофшудаи умумибашарӣ, ки натиҷаи рушду инкишофи афкори сиёсӣ ва ҳуқуқии инсоният мебошанд, иброз дошта, онҳоро дар баробари арзишҳои миллии худ мавриди истифода ва арзёбӣ қарор додаанд. Барои рушди тамоми шохаҳои ҳокимияти давлатӣ имконияти васеъ фароҳам гардид.
Бешубҳа, қабули Конститутсия дастоварди бузурги халқ дар роҳи давлатсозиву давлатдории навин маҳсуб ёфта, он дар як вақт барои пойдории сулҳу суботи комил, ваҳдати миллӣ ва ташаккули ниҳодҳои гуногуни ҷомеаи шаҳрвандӣ дар кишварамон нақши созгор дорад ва дар заминаи он сатҳи маърифати сиёсӣ, ҳуқуқӣ ва фарҳангии аҳолӣ баланд гардид.
Д. НАЗИРМАДЗОДА,
корманди дастгоҳи суди шаҳри Душанбе,
Ҷ. ҶАМИЛЗОДА,
корманди дастгоҳи суди ноҳияи Фирдавсӣ
Баёни ақида (0) Санаи нашр: 05.11.2020 №: 216 Мутолиа карданд: 1028
