фарҳанг
ПРЕЗИДЕНТ ВА РУШДИ ФАЪОЛИЯТИ ТЕАТРӢ
Айни замон дар ҷумҳурӣ 18 театри касбӣ (6 театр дар шаҳри Душанбе, 7 – то дар вилояти Суғд, 4 - то дар вилояти Хатлон, 1 - то дар Вилояти Мухтори Кӯҳистони Бадахшон), 6 муассисаи консертӣ ва Сирки давлатии Тоҷикистон бо мақсади қонеъ гардондани талаботи маънавии ҷомеа фаъолият доранд.
Дар ин давра, бо қарорҳои Ҳукумати Ҷумҳурии Тоҷикистон Барномаи давлатии рушди санъати театрӣ дар Ҷумҳурии Тоҷикистон барои солҳои 2013-2019 ва Барномаи давлатии рушди санъати сирк дар Ҷумҳурии Тоҷикистон дар солҳои 2013-2017 қабул ва амалӣ гардиданд. Барномаҳои мазкур барои мустаҳакамшавии базаи моддию техникӣ ва кадриву фаннии муассисаҳои мазкур такони ҷиддӣ бахшида, бобати инкишофи минбаъдаи онҳо заминаҳои боэътимод ба вуҷуд оварданд.
Тӯли солҳои 2013 - 2020 бо ибтикори Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар миқёси ҷумҳурӣ ду театри касбӣ - Театри вилоятии лӯхтаки “Афсона” - и шаҳри Бохтар, Театри ҷумҳуриявии драмаи мусиқии ба номи Маҳмудҷон Воҳидови ноҳияи Ашт ва як муассисаи консертӣ - Филармонияи давлатии бачагонаи Тоҷикистон таъсис ёфтанд, ки фаъолияти пурсамар дошта, дар инкишофи санъати касбии тоҷик ва тарғибу ташвиқи он дар арсаи ҷаҳонӣ саҳми назаррас доранд. Дар идомаи ин иқдомот ба бунёди бузургтарин театр дар Осиёи Марказӣ - Театри миллии Тоҷикистон санги асос гузошта шуд. Биноҳои нави Театри мусиқӣ – мазҳакавии ба номи Ато Муҳаммадҷонови шаҳри Бохтар ва Театри мусиқӣ - драмавии ба номи Меҳрубон Назарови шаҳри Хоруғ сохта ба истифода дода шуда, сохтмони Театри давлатии драмавии русии ба номи Владимир Маяковский дар шаҳри Душанбе идома дорад.
Аз соли 2013 то нимсолаи аввали соли 2020 дар театрҳои касбии кишвар 450 намоиши нав аз рӯи асарҳои драманависони ватаниву хориҷӣ, аз қабили балети «Мақоми ишқ» - и Фирӯз Баҳор, “Зол ва Рӯдоба” - и Шуҳрат Ашӯров, операи “Хусрав ва Ширин” - и Амирбек Мӯсоев ва «Тоска» - и Ҷакомо Пуччини дар Театри давлатии академии опера ва балети ба номи Садриддин Айнӣ, асарҳои “Фирдавсӣ” - и Сотим Улуғзода, “Кавсан” - и Ҷумъа Қуддус, “Обу оташ” - и Мансур Суруш дар Театри давлатии академии драмавии ба номи Абулқосим Лоҳутӣ, «Нидои Хайём» - и Темур Зулфиқоров, «Тартюф» аз рӯи асари Жан Батист Поклен Молйер, «Ҳамлет» - и Уилям Шекспир дар Театри давлатии драмавии русии ба номи Маяковский, “Солори Аҷам” - и Файзи Ашӯр дар Театри мусиқӣ – мазҳакавии ба номи Сайдалӣ Вализодаи шаҳри Кӯлоб, «Гумроҳон» - и Далер Мирхонов дар Театри давлатии ҷавонон ба номи Маҳмудҷон Воҳидов, “Баҳори Фаронса” - и Тоҳир Маҳмадризоев дар Театри ҷумҳуриявии мусиқӣ - драмавии ноҳияи Данғара, Парвози Шоҳин” - и Сафармуҳаммад Айюбӣ дар Театри вилоятии мусиқӣ - мазҳакавии ба номи Сайдалӣ Вализодаи шаҳри Кӯлоб, “Тақдир” ва “Доғ” - и Нарзулло Шарифов дар Театри ҷумҳуриявии драма ва мазҳакаи русии ба номи Пушкини шаҳри Бӯстон, намоишномаи “Пораи дили модар” - и Ҳ. Шариф дар Театри тамошобини навраси ба номи Одилҷон Назарови шаҳри Хуҷанд ва ғайра саҳнавӣ гардиданд.
Дар маҷмӯъ, солҳои 2013 - 2020 барои соҳаи санъату ҳунар таҳти сиёсати фарҳангпарваронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон давраи бобарор ва рушд маҳсуб мешавад.
М.САИДОВ,
сардори раёсати санъати
Вазорати фарҳанги Ҷумҳурии Тоҷикистон
Баёни ақида (0) Санаи нашр: 16.11.2020 №: 221 Мутолиа карданд: 788
