сиёсат
«ПЕШВОИ ФАРҲАНГПАРВАРИ МИЛЛАТ»
Таҳти ин унвон бо ибтикори Ҳизби Халқии Демократии Тоҷикистон дар Донишкадаи давлатии фарҳанг ва санъати Тоҷикистон ба номи Мирзо Турсунзода бахшида ба Рӯзи Президенти Ҷумҳурии Тоҷикистон конфронси ҷумҳуриявӣ баргузор гардид. Дар ҳамоиш ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода, муовини Раиси ҲХДТ Хайринисо Юсуфӣ, вазири фарҳанг Зулфия Давлатзода, раиси кумитаи Маҷлиси намояндагон оид ба сохтори давлатӣ ва худидоракунии маҳаллӣ Абдураҳим Холиқзода, раиси Кумитаи кор бо занон ва оила Ҳилолбӣ Қурбонзода, иштирокчии Иҷлосияи XVI Шӯрои Олӣ Рафиқа Мӯсоева ва дигарон иштирок ва суханронӣ намуданд.
Абдуҷаббор Раҳмонзода зимни баромад зикр кард, ки дар сатҳи баланди ташкиливу ғоявӣ баргузор намудани ин ҷашни муқаддас нишонаи шукргузорӣ аз озодиву соҳибихтиёрӣ ва эҳтиром гузоштан ба арзишҳои давлатдориву соҳибистиқлолӣ мебошад.
- Ба бахти миллати куҳанбунёди мо, дар лаҳзаҳои ҳассоси таърихи халқи тоҷик Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба таъсиру нуфузи ҷаҳонии худ баромад карда, низоми президентиро на танҳо ба қаринаи (контексти) фарҳанги сиёсии халқи тоҷик ворид намуданд, балки пойдору мустаҳкам карда, сазовори бовари аҳли ҷомеаи кишвар гардиданд, - иброз дошт А. Раҳмонзода.
Хайринисо Юсуфӣ дар бораи хизматҳои шоистаи Сарвари давлат дар самтҳои мухталифи ҳаёти ҷомеа ибрози назар намуда, таъкид кард, ки Пешвои муаззами миллат дар таърихи миллати тоҷик аз дурахшонтарин чеҳраҳое мебошанд, ки бо фаросату ҷасорат, сиришти пок ва фитрати азалии худ дар маснади бузурги роҳбарӣ нишастанд ва давлатдории миллии тоҷиконро дар даврони муосир асос гузоштанд.
Ба андешаи Зулфия Давлатзода, таҷлили Рӯзи Президент ҳамчун ҷашни муҳими давлатӣ дар баробари ибрози эҳтироми ҷомеа ба Президент, омили муҳими сарҷамъию муттаҳидӣ низ мебошад.
Мавсуф аз дастовардҳои фарҳангии кишвар дар даврони соҳибистиқлолӣ ёдовар шуда, афзуд, ки сиёсати фарҳангии давлати соҳибихтиёри Тоҷикистон аз Иҷлосияи ХVI Шӯрои Олӣ, пас аз бо заковати фитрии намояндагони мардумӣ ба вазифаи Раиси Шӯрои Олӣ интихоб шудани Эмомалӣ Раҳмон оғоз меёбад. Хусусан, ин раванд аз соли 1994, баъди бо роҳи раъйпурсии умумихалқӣ ба мансаби Президенти Ҷумҳурии Тоҷикистон интихоб шудани муҳтарам Эмомалӣ Раҳмон вусъати тоза гирифт.
Ректори донишкада Муҳриддин Низомӣ дар охири конфронс зикр кард, ки обрую эътибори Тоҷикистон ба шарофати фазилату фидокории Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон чун субъекти ҳуқуқи байналмилалӣ сол ба сол боло рафта, ҳамчун узви ҷудонопазири ҷомеаи байналмилалӣ эътироф гаштааст. Ба қадри ин шахсият расидан, номи ӯро гиромӣ доштан ва роҳи интихобкардаи ӯро ҳифз карда, идома додан - ин қадршиносӣ аз давлати миллӣ, демократӣ, ҳуқуқбунёд ва дунявии Тоҷикистон аст.
Алишер АВҒОНОВ, муовини ректор оид ба илм ва рушди инноватсионӣ,
Додоҷон РӮЗИЕВ, муҳаррири маҷаллаи илмии «Фарҳанг ва санъат»
Баёни ақида (0) Санаи нашр: 19.11.2020 №: 223 Мутолиа карданд: 746
