иқтисод
«ФЕРМАИ ХУРД Ё ХОНАИ ЗИСТ?»
«Ҷумҳурият» аз 27 августи соли 2020
Мақомоти иҷроияи ҳокимияти давлатии шаҳри Бохтар баҳри иҷрои муқаррароти Фармони Президенти Ҷумҳурии Тоҷикистон «Дар бораи вокуниши шахсони мансабдор ба маводҳои танқидӣ ва таҳлилии воситаҳои ахбори омма» аз 7 феврали соли 2009, № 622, ба мақолаи нашрияи «Ҷумҳурият» таҳти унвони «Фермаи хурд ё хонаи зист?» иттилоъ медиҳад, ки то имрӯз дар ин самт як қатор корҳо ба анҷом расонда шуданд.
Аз ҷумла, мақолаи мазкур дар маҷлиси назоратии назди раиси шаҳр бо иштироки масъулини соҳа мавриди таҳлилу баррасӣ қарор гирифта, бобати ислоҳи саривақтии нуқсону камбудиҳои дар ин самт ҷойдошта шахсони масъул вазифадор карда шуданд.
Аз рӯи факту далелҳои дар мақола дарҷгардида аз ҷониби кормандони маркази таъминоти бехатарии озуқавории шаҳри Бохтар дар як қатор хонаҳои истиқоматии атрофи ҶДММ «Фаровон» санҷиш гузаронда шуда, баъзе камбудиҳоро ошкор ва барои рафъи онҳо ба соҳибони хонаҳо огоҳинома дода шуд. Чуноне аз рафти санҷиш муайян гардид, дар ҳавлии соҳибкори инфиродӣ Муҳиддин Халилов ҳафт сар чорвои калони шохдор барои забҳ нигоҳ дошта мешуд ва ҷойи забҳ дар замини наздиҳавлигӣ қарор дошт. Ин оила дар бозори «Фаровон» нуқтаи гӯштфурӯшӣ дошта, рӯзҳои ҷумъа аз молбозори «Ҳоҷӣ Шариф» чорво харида, онро тӯли ҳафта дар ҳавлиаш нигоҳ дошта, пасон забҳ намуда, гӯшташонро дар бозори «Фаровон» ба фурӯш мебароранд.
Бо сабаби ба талаботи беҳдоштии бойторӣ ҷавобгӯ набудани забҳхонаи соҳибкор М. Халилов аз ҷониби маркази таъминоти бехатарии озуқавории шаҳри Бохтар нисбаташ протоколи маъмурӣ тартиб дода, ҷарима шуд. Нисбати 3 соҳибкори дигар низ амрномаҳо бароварда шуданд. Мутасаддиёни маркази таъминоти бехатарии озуқаворӣ баҳри таъмини амнияти экологӣ ва бехатарии аҳолӣ ҳамарӯза назоратро ба роҳ мондаанд.
Сиҷоуддин САЛОМЗОДА, раиси шаҳри Бохтар
Баёни ақида (0) Санаи нашр: 27.11.2020 №: 229 Мутолиа карданд: 482
