порлумон
ТАҒЙИРИ НОМУ НАСАБ.
ҚОНУНГУЗОРӢ ОНРО СОДАТАР КАРД
Бо мақсади кам намудани муҳлати баррасии ариза дар бораи иваз намудани насаб, ном ва (ё) номи падар лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи бақайдгирии давлатии асноди ҳолати шаҳрвандӣ» таҳия шудааст. Тибқи тағйироти пешниҳодгардида ариза дар бораи иваз намудани насаб, ном ва (ё) номи падар дар муддати на дертар аз як моҳ аз рӯзи додани ариза баррасӣ мешавад. Ҳамзамон, дар сурати ҷой доштани сабабҳои узрнок, муҳлати баррасии ариза понздаҳ рӯз дароз мегардад.
Ин масъаларо Музаффар Ашуриён, вазири адлияи Ҷумҳурии Тоҷикистон, дар ҷаласаи навбатии Маҷлиси намояндагони Маҷлиси Олӣ, ки таҳти раёсати Маҳмадтоир Зокирзода, Раиси Маҷлиси намояндагон, баргузор шуд, ба баррасии вакилон гузошт.
Дар ҷаласа, инчунин, лоиҳаи Қонуни Ҷумҳурии Тоҷикистон «Дар бораи ворид намудани тағйирот ба Кодекси андози Ҷумҳурии Тоҷикистон» баррасӣ шуд. Вобаста ба ин, Карим Гулмуродзода, муовини вазири молия, таъкид кард, ки лоиҳаи қонуни мазкур бо мақсади тамдид намудани муҳлати амали андоз аз истифодабарандагони роҳҳои автомобилгард таҳия гардидааст. Мутобиқи сархати сеюми моддаи 252 Кодекси андози Ҷумҳурии Тоҷикистон андоз аз истифодабарандагони роҳҳои автомобилгард аз 31 декабри соли 2020 бекор мешавад.
Ҷамолиддин Абдуллозода, вазири тандурустӣ ва ҳифзи иҷтимоии аҳолӣ, зимни баррасии лоиҳаи Қонуни Ҷумҳурии Тоҷикистон «Оид ба ворид намудани иловаҳо ба Қонуни Ҷумҳурии Тоҷикистон «Дар бораи маводи доруворӣ ва фаъолияти фарматсевтӣ» иброз намуд, ки мақсади асосии лоиҳаи қонуни мазкур муҳайё намудани шароит ва содакунонии ҳуҷҷатгузорӣ ҳангоми бақайдгирии маводи доруворӣ ва молҳои тиббӣ, истеҳсол ва додани имтиёзҳо ҳангоми истифодаи онҳо дар амалиётҳои ҳарбӣ, ҳолатҳои фавқулода, паҳншавии эпидемия, пешгирӣ ва табобати бемориҳо, ки дар натиҷаи таъсири омилҳои номусоиди кимиёвӣ, биологӣ ва радиатсионӣ пешбинӣ мешаванд, иборат мебошад.
Лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи ҳимояи ҳуқуқи истеъмолкунандагон» - ро сардори Хадамоти зиддиинҳисорӣ Абдулмаҷид Муъминзод баррасӣ намуда, иброз дошт, ки тағйиру иловаҳои пешбинигардида ба бартараф намудани норасоиҳо ва бархӯрди манфиатҳо, рушду такомули муносибатҳои байни истеъмолкунандагон, истеҳсолкунандагон, иҷрокунандагон ва фурӯшандагон мусоидат менамояд.
Лашкар ШАРИФЗОДА, «Ҷумҳурият»
Баёни ақида (0) Санаи нашр: 4.12.2020 №: 233 Мутолиа карданд: 8879
