Бо ташаббуси маркази таҳия, нашр ва муомилоти китобҳои дарсӣ, илмию методии Вазорати маориф ва илми Ҷумҳурии Тоҷикистон барномаҳои таълими фанни табиатшиносию география барои мактаб - интернатҳои кӯдакони ношунаво (кар) ва сустшунавою деркаршуда (синфҳои 4 - 7 ва 6 - 11) ба чоп расид.
Бояд гуфт, ки чанд соли охир Вазорати маориф ва илм ба мушкилиҳои муассисаҳои таълимии махсус ҷиддан диққат дода, барои ҳал кардани масоили дар атрофи фаъолияти онҳо вуҷуддошта, аз ҷумла ҷиҳати бо адабиёти таълимӣ таъмин кардани хонандагони ин намуди муассисаҳои таълимиву тарбиявӣ, ,диққати махсус медиҳад.
То имрӯз барои кӯдакони ношунаво ва гунг китобҳои дарсии «Алифбо» барои мактабҳои кӯдакони шунавоияшон суст, «Алифбо» барои синфҳои тайёрии мактабҳои кӯдакони ношунаво, «Китоби хониш» барои синфи 1 мактабҳои кӯдакони ношунаво, «Талаффуз» барои хонандагони синфҳои 1 - 2 мактабҳои кӯдакони ношунаво ва «Инкишофи нутқ» барои синфи 2 кӯдакони ношунаво нашр шудаанд. Соли 2019 қисмати дуюми китоби дарсии «Имову ишора» низ интишор ёфт.
Барномаи комплексӣ оид ба варзиши мутобиқгардондашудаи хонандагони аз ҷиҳати фитрӣ инкишофнаёфтаи синфҳои I – IV мактаб - интернатҳои ёрирасон таҳия гардид. Имсол дастурҳои «Тарбияи ҷисмонӣ барои хонандагони имкониятҳои маҳдуддошта», «Ташкил ва баргузор кардани бозиҳо барои кӯдакони иллатдошта ба воситаи бозиҳои амалӣ ва машқҳо» бо қарори шӯрои миллии таҳсилоти Вазорати маориф ва илми Ҷумҳурии Тоҷикистон ба нашр тавсия гардиданд.
Аз маркази таҳия, нашр ва муомилоти китобҳои дарсӣ, илмию методӣ изҳор доштанд, ки дар ин самт бо мақолаҳои таҳлилӣ пайгирӣ кардани мавзӯи ношунавоён дар рӯзномаи “Ҷумҳурият” боиси истиқбол буда, дар такмили кори таҳиягарон ёрӣ мерасонад.

Бузургмеҳри БАҲОДУР, “Ҷумҳурият”