порлумон
МУБОРИЗА БО COVID-19.
600 МИЛЛИОН ЙЕН КУМАКИ БАШАРДӮСТОНАИ ЯПОНИЯ
Дар ҷаласаи навбатии Маҷлиси намояндагони Маҷлиси Олӣ якчанд масъала, аз ҷумла «Мубодилаи ёддоштҳо байни Ҳукумати Ҷумҳурии Тоҷикистон ва Ҳукумати Япония оид ба кумаки башардӯстонаи Ҳукумати Япония барои мубориза бо COVID-19 дар доираи Барномаи рушди иқтисодӣ ва иҷтимоӣ ва лоиҳаи Қонуни Ҷумҳурии Тоҷикистон «Оид ба ворид намудани тағйир ба Қонуни Ҷумҳурии Тоҷикистон «Дар бораи тартиб ва шароити дар ҳабс нигоҳ доштани гумонбаршуда, айбдоршаванда ва судшаванда» баррасӣ гардид.
Зимни баррасии масъалаи якум Ғафур Муҳсинзода, муовини аввали вазири тандурустӣ ва ҳифзи иҷтимоии аҳолӣ, таъкид кард, ки мубодилаи ёддоштҳои мазкур бо мақсади ҷалби маблағгузорӣ барои татбиқи тадбирҳо ҷиҳати мубориза бо COVID-19 аз ҷониби Вазорати тандурустӣ ва ҳифзи иҷтимоии аҳолӣ таҳия шудааст. Маблағи умумии лоиҳа 600 миллион йени ҷопониро ташкил дода, он ҳамчун маблағи грантӣ ба ҳисоб меравад.
Гуфта шуд, ки сар задани бемории COVID-19 бори дигар нишон дод, ки на ҳамаи сохторҳои тандурустии кишвар ба ҳолатҳои ғайричашмдошт омода мебошанд ва омили мазкур, аз ҷумла бо назардошти танқисӣ аз мутахассисони касбӣ дар минтақаҳои дурдаст, ҳолати ғайричашмдошти як қатор инфрасохтори муассисаҳои тиббӣ, норасоии таҷҳизоти зарурӣ ва ташхисгоҳҳои замонавӣ, инчунин, нокифоя будани дастрасии аҳолӣ ба хизматрасонии пурраи тиббӣ ба амал омадааст.
Қисми зиёди таҷҳизот ва ташхисгоҳҳо аз замони шӯравӣ то имрӯз мавриди истифода қарор доранд ва бо тағйир ёфтани стандартҳои ҷаҳонӣ, пайдо шудани усулҳои нави ташхис ва табобат, хизматрасонӣ ва ёрии тиббӣ тақозои татбиқи маҷмӯиро талаб менамояд. Бинобар ин, харидорӣ ва дастрас намудани таҷҳизоти замонавӣ аз тарафи Ҳукумати Япония ниҳоят муҳим ва саривақтӣ арзёбӣ мегардад.
Зимни баррасии лоиҳаи Қонуни Ҷумҳурии Тоҷикистон «Оид ба ворид намудани тағйир ба Қонуни Ҷумҳурии Тоҷикистон «Дар бораи тартиб ва шароити дар ҳабс нигоҳ доштани гумонбаршуда, айбдоршаванда ва судшаванда» гуфта шуд, ки лоиҳаи қонуни мазкур бо мақсади мутобиқгардонии қонуни амалкунанда ба талаботи қонунҳои Ҷумҳурии Тоҷикистон «Дар бораи адвокатура ва фаъолияти адвокатӣ» ва «Дар бораи санадҳои меъёрии ҳуқуқӣ», инчунин, татбиқи муқаррароти Консепсияи сиёсати ҳуқуқии Ҷумҳурии Тоҷикистон барои солҳои 2018-2028 ва амалисозии Барномаи ислоҳоти судӣ - ҳуқуқӣ дар Ҷумҳурии Тоҷикистон дар самти мукаммалсозии қонунгузории мурофиавии ҷиноятии Тоҷикистон ва мутобиқгардонии ин самт бо меъёрҳои байналмилалии эътирофнамудаи Тоҷикистон таҳия шудааст.
Дар сархати якуми қисми 2 моддаи 18 Қонуни Ҷумҳурии Тоҷикистон «Дар бораи тартиб ва шароити дар ҳабс нигоҳ доштани гумонбаршуда, айбдоршаванда ва судшаванда» калимаҳои «ё иҷозатномаи пешбурди фаъолияти адвокатӣ» ба калимаҳои «ва шаҳодатномаи адвокатӣ» иваз карда мешаванд, яъне ба адвокат ҷиҳати мулоқот намудан бо гумонбаршуда, айбдоршаванда ва судшаванда дар асоси пешниҳоди ордер ва шаҳодатномаи адвокатӣ иҷозат дода мешавад.
Лашкар ШАРИФЗОДА,
«Ҷумҳурият»
Баёни ақида (0) Санаи нашр: 18.12.2020 №: 241 Мутолиа карданд: 8922