Ба ифтихори 30-солагии Истиқлолияти давлатии Ҷумҳурии Тоҷикистон ва дар доираи  Солҳои рушди деҳот, сайёҳӣ ва ҳунарҳои мардумӣ (2019 – 2021) таҳти ҳамин унвон дар Донишкадаи давлатии забонҳои Тоҷикистон ба номи Сотим Улуғзода конференсияи байналмилалии илмию амалӣ баргузор шуд.
Дар он муовини якуми вазири маориф ва илм Муҳаммаддовуд Саломиён, намояндаи Кумитаи забон ва истилоҳот Раҳим Зулфониён, профессорону олимон аз макотиби олии кишвар ва хориҷи мамлакат ширкат карданд.
Зимни ифтитоҳи конференсия, ректори донишкада Жило Гулназарзода иброз дошт, ки дар замони ҷаҳонишавии фазои иттилоотӣ инъикоси муҳимтарин дастоварду ихтирооти илмӣ ва илмӣ-техникӣ, ҳамоишҳои илмии сатҳи ҷумҳуриявӣ ва байналмилалӣ, баланд бардоштани савияи маърифату ҷаҳонфаҳмии илмии олимону мутахассисон ва тарбияи худшиносии миллӣ муҳим арзёбӣ мегардад.
- Дастуру ҳидоятҳои пайвастаи Пешвои муаззами миллат муҳтарам Эмомалӣ Раҳмон дар самти омӯзиши забонҳои хориҷӣ ва шиносоӣ бо фарҳангу тамаддуни мардуми дунё дар шароити кунунии робитаҳои Тоҷикистон бо кишварҳои гуногуни олам барои густариши ҳамкориҳои гуногунпаҳлу ва шинохту гиромидошти арзишҳои умумибашарӣ нақши муҳим мебозад, - афзуд Жило Гулназарзода.
Муҳаммаддовуд Саломиён ба раванди баргузории конференсияи байналмилалӣ баҳои баланд дода, дар бораи забон, тарҷума ва рушди онҳо дар замони соҳибистиқлолӣ сухан гуфт.
Ҳамчунин, дигар иштирокдорон дар мавзӯъҳои “Ҷойгоҳи забон ва фарҳанги миллӣ дар масири фарҳангҳо ва тамаддунҳо”, “Мавзӯи ҳикоят ва романҳои адиб Абдул Бисмиллоҳ”, “Нигоҳи Кришан Чандар ба бархӯрдҳои мазҳабӣ дар Ҳиндустон”, “Робитаҳои Чин ва Тоҷикистон дар даврони истиқлол”, “Бозтоби унсурҳои тамаддуни шарқӣ ва фарҳанги миллӣ дар ашъори Назирии Нишопурӣ” ва “Перевод и диалог цивилизации”  сухан ронданд.
Боиси зикр аст, ки дар конференсия намояндагони Россия, Чин, Ҳиндустон ва Швейтсария тариқи онлайн ширкат карда, вобаста ба масоили мавриди назар маърӯза карданд.

Доро СӮҲРОБӢ,
Донишкадаи давлатии забонҳои Тоҷикистон
ба номи Сотим Улуғзода