маориф
САМАРАИ ЗАҲМАТ
Соҳаи маориф аз аввали солҳои соҳибистиқлолӣ дар меҳвари таваҷҷуҳи ҳамешагии Ҳукумати Ҷумҳурии Тоҷикистон қарор дорад. Маҳз ба шарофати сиёсати маорифпарваронаи роҳбарияти олии мамлакат тайи солҳои охир ҷавонони донишманду соҳибҳунар ба воя расида, дар тамоми соҳаҳо ба комёбиҳо ноил мегарданд ва барои рушду нумӯ, инчунин, боло рафтани обруву нуфузи кишвар дар арсаи байналмилалӣ саҳми арзанда мегузоранд. Яке аз чунин ҷавонони муваффақ Табарзода Беҳрӯзи Довудхоҷа мебошад, ки айни ҳол дар Донишгоҳи давлатии Комсомолск дар Амури Федератсияи Русия ба ҳайси омӯзгори калони кафедраи ҳаракатовари электрикӣ ва автоматикунонии таҷҳизоти саноатӣ фаъолият дорад.
Беҳрӯз хатмкардаи муассисаи таҳсилоти миёнаи умумии № 12 - и ноҳияи Ховалинг буда, соли 2009 ба факултети энергетикаи Донишгоҳи техникии Тоҷикистон ба номи академик М.С. Осимӣ дохил шуд. Баъди хатми донишгоҳ дар ҶСК “Тоҷикгидроэлектромонтаж” ба сифати муҳандис - барқгар кор кардааст. Шавқу ҳаваси беандоза ба донишандӯзӣ ӯро ба риштаи аспирантураи Донишгоҳи давлатии Комсомолск дар Амур бурд.
Соли 2019 рисолаи номзадиашро аз рӯи ихтисоси “Комплексҳо ва системаҳои электротехникӣ” дар мавзӯи “Коркард ва тадқиқоти дастгоҳи реактор - тиристор барои зеристгоҳҳои трансформаторӣ” ҳимоя намуда, пас аз итмоми аспирантура дар Донишгоҳи давлатии Комсомолск дар Амур ҳамчун омӯзгор ба фаъолият пардохт. Боиси тазаккур аст, ки зимни таҳсил дар аспирантура ӯ дар ҶСК “Амурметалл” тадқиқоти илмӣ гузаронда, ба як қатор дастовардҳои назаррас ноил мешавад.
Таҳқиқоти анҷомдода ба ӯ имкон дод, ки дар озмуни россиягии “Умник – 2020” ширкат намуда, миёни ҳазорҳо иштирокдорон дар қатори 252 ғолиб ҷой гирад ва баҳри татбиқи лоиҳаи “Таҳияи модули реактор - тиристор барои зеристгоҳҳои трансформаторӣ” соҳиби грант гардад.
Қобили зикр аст, ки як қатор мақолаҳои илмии ӯ дорои мақомҳои байналмилалии SCOPUS ва WEB OF SCIENCE буда, дар маҷаллаҳои Русия, Тоҷикистон ва Қазоқистон нашр шудаанд.
Олими ҷавону ояндадор Беҳрӯзи Довудхоҷа аз ҷавонони кишвар даъват ба амал меорад, ки аз шароити мусоиди илмомӯзии аз ҷониби Ҳукумати кишвар барояшон фароҳамоварда, вақти қимати худро самаранок истифода бурда, кӯшиш ба харҷ диҳанд, то дар соҳаҳои интихобкардаашон муваффақ бошанд ва дар рушду равнақи Тоҷикистони азиз ҳисса гузоранд.
Руқия ҚУРБОНОВА, “Ҷумҳурият”
Баёни ақида (0) Санаи нашр: 30.12.2020 №: 250 - 251 Мутолиа карданд: 3287
