фарҳанг
ОЗМУНЕ, КИ ЗИЁ ОВАРД
Таҳти сарпарастии Президенти кишвар аз соли 2019 Озмуни ҷумҳуриявии “Фурӯғи субҳи доноӣ китоб аст” баргузор мегардад, ки дар боло рафтани шумораи китобхонон мусоидат мекунад. Он бо мақсади баланд бардоштани завқи хонандагон, тақвияти ҳофизаи таърихӣ, дарёфти чеҳраҳои нави суханвару сухандон, арҷ гузоштан ба арзишҳои милливу фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ, бой намудани захираи луғавӣ, тақвияти ҷаҳони маънавӣ ва фаъолгардонии доираи забондонӣ миёни қишрҳои мухталифи ҷомеа, аз ҷумла хонандагону донишҷӯёни ҳамаи зинаҳои таҳсилот, инчунин, магистрҳо, аспирантҳо, докторантҳо ва шаҳрвандони кишвар доир мегардад.
Боиси тазаккур аст, ки баъди озмуни ҷумҳуриявӣ сафи китобхонон дар байни тамоми қишрҳои ҷомеа зиёд гардида, шумораи муштариёни китобхонаҳо чандин маротиба афзуд. Ба фикри Ҳафиз Раҳмон, донишманд ва яке аз ҳакамони озмун, ин чорабинӣ бисёре аз чеҳраҳои нави ҷавону наврасро ошкор намуд, ки он аз ояндаи дурахшони миллат дарак медиҳад. “Иштирокчиёни озмун бо сатҳи дарк ва андешарониҳояшон фарқ доранд, аллакай, онҳо бо тафаккури худии ҳосилшуда аз мутолиа сарукор мегиранд. Онҳо зиндагиро дигар мекунанд”, - гуфт ӯ.
Маврид ба зикр аст, ки бархе аз иштирокчиён бо сатҳи дониши худ бинандаҳоро дар ҳайрат гузоштанд. Яке аз онҳо Раъно Насриддинова мебошад, ки соҳиби Шоҳҷоиза гардид. Ӯ дар бораи озмун чунин назар дорад: “Он зиндагии ман, тасаввур ва хаёлотамро дигар кард. Он инқилоби мадании мост. Ҷавонон бо ширкат дар ин озмун иродаи худро қавӣ гардонда, масъулиятшинос мешаванд. Китобхон шудани насли нав беҳтарин армуғони ин сабқат аст”.
Дар ҳақиқат, “Фурӯғи субҳи доноӣ китоб аст” ба ҳаёти фарҳангии мо нуру зиё ворид кард.
Руқия ҚУРБОНОВА, “Ҷумҳурият”
Баёни ақида (0) Санаи нашр: 06.01.2021 №: 3 Мутолиа карданд: 462
