фарҳанг
ҶОМЕА. ВАҚТЕ АКСАРИЯТИ АҲОЛӢ ҶАВОН АСТ...
Ҷавонон дар ҳама давру замон неруи пешбарандаи ҷомеа ба шумор рафта, дурнамои ҳар қавму миллат аз насли ҷавони дурандешу худогоҳаш вобастагӣ дорад. Маъмулан, дар аксарияти кишварҳои олам масъалаҳои марбут ба ҷавонон ҳамеша мавриди таваҷҷуҳи давлату Ҳукумат қарор дорад. Аз ин рӯ, ҷавонони аз лиҳози ҷисмонӣ қавиву боирода яке аз захираҳои муҳими ҳар як давлат ва ҷомеа ба шумор мераванд.
Ҳукумати мамлакат аз замони ба даст овардани Истиқлолияти давлатӣ ба ҷавонони кишвар таваҷҷуҳи махсус медиҳад ва баҳри рушди онҳо имкониятҳои васеъ фароҳам оварда шудааст. Ҳоло 70 дарсади аҳолии ҷумҳуриро шахсони то 30 - сола ташкил медиҳанд ва онҳо неруи бузурги мутаҳаррики пешрафти кишвар мебошанд. Боиси сарфарозист, ки имрӯз ҷавонони тоҷик бо шоҳкориҳои бузурги худ дар самтҳои мухталифи ҷомеаи ҷаҳонӣ кишвари соҳибистиқлоламонро муаррифӣ намуда, ба ифтихори эшон Парчами давлатии Тоҷикистон боло бардошта мешавад. Хусусан, дар самти варзиш комёбиҳои варзишгарони мо лоиқи эътирофанд. Тавре маълум аст, ҷавонони тоҷик дар мусобиқаҳои гуногуни минтақавию байналмилалӣ иштирок карда, ҷойҳои намоёнро сазовор мегарданд.
Мавриди зикр аст, ки дар шароити муосир танҳо доштани неруи ҷисмонӣ барои рушди кишвар кифоя нест. Яъне, бояд ҷавонон донандаи хуби илмҳои муосир ва техникаву технологияи ҳозиразамон бошанд. Аз ин рӯ, неруи ҷавонон танҳо дар он ҳолат сазовори ифтихору шараф аст, ки агар он сарчашмаи тавлидкунандаи идеяву назарияҳои нави илмӣ, созандагӣ, ободкориву бунёдкорӣ, омили суботи ҷомеа ва амнияти давлатӣ бошад. Бо пешрафту тараққиёти рӯзафзуни ҷомеа ва рушди соҳаҳои гуногуни мамлакат, инчунин, барои дар муқобили таҳаввулот ва пешрафти ҷаҳони муосир устувор будану мавқеи худро миёни ҷомеа дарёфтан зарур аст, ки ба сатҳу сифати илму дониш таваҷҷуҳи бештар зоҳир гардад.
Айни ҳол дар мамлакат беш аз 636 муассисаи таҳсилоти томактабию кӯдакистон мавриди амал қарор доранд, ки дар он 96 ҳазор наврас ва зиёда аз 1600 маркази инкишофи кӯдакон бо фарогирии 46300 наврас ба таълиму тарбия ва ба омӯзиш машғуланд. Ҳамзамон, дар назди чанде аз муассисаҳои таҳсилоти миёнаи умумии мамлакат низ муассисаҳои омоданамоӣ ба мактаб таъсис дода шудаанд, ки ин ҳам тадбири хубе дар ин самт маҳсуб меёбад.
Дар давлатҳои мутараққии ҷаҳон наврасон аз синни хурдсолӣ ба таҳсил ҷалб карда мешаванд. Зеро, ба андешаи равоншиносон давраи ташаккулёбии майнаи наврасон ҳамин давра мебошаду имкони бештару хубтар ва дақиқ қабул кардани донишу маълумот ҳам, хусусан, дар ин муддат беҳтар будааст. Онҳо бар он назаранд, ки дар ин муддат бояд наврасон бештар ба таълиму омӯзиш фаро гирифта шаванд.
Тавре масъулон иброз медоранд, шумораи наврасоне, ки айни ҳол ба боғчаҳо фаро гирифта мешаванд, 14 дарсадро ташкил медиҳад, ки бо ин шумора наметавон ба мақсаду ҳадафҳои дарпешбуда комёб шуд. Дар асоси дастуру фармоиши Вазорати маориф ва илми Ҷумҳурии Тоҷикистон то соли 2021 то 30 дарсади кӯдакон бояд ба таҳсили томактабӣ фаро гирифта шаванд. Бо маҳсулоти хӯрокаи хушсифат таъмин намудани кӯдакистон ва додани хурду хӯроки солиму саривақтӣ аз омилҳои дигарест, ки баҳри ҷалби кӯдакон ба ин муассисаҳо замина мегузорад. Ин ҳам барои пешрафти мунтазами соҳаи маориф қадами устуворе буда, ҷиҳати ба камол расондани наврасони пешқадам даст медиҳад.
Ба хотири беҳтар фаро гирифтани насли наврасу ҷавони кишвар имрӯз давлат, ҷомеа ва волидайнро зарур аст, ки масъулияти даҳчанд эҳсос намуда, имкониятҳои иқтисодии хешро барои рушди маънавию ҷисмонии ояндасозони ҷомеа сарф намоянд. То онҳо ҳамчун парчамбардори миллат омода буда, обрӯву эътибори Ватани худ - Тоҷикистони азизро дар арсаи байналмилалӣ боло бардоранд ва мояи ифтихори наслҳои оянда бошанд.
Нигина ДАВЛАТЗОДА,
корманди Вазорати тандурустӣ
ва ҳифзи иҷтимоии аҳолӣ
Баёни ақида (0) Санаи нашр: 07.01.2021 №: 4 Мутолиа карданд: 454
