Дар Донишкадаи давлатии санъати тасвирӣ ва дизайни Тоҷикистон намоиши корҳои эҷодии яке аз рассомони шинохтаи тоҷик, собиқ раиси Иттифоқи рассомони Тоҷикистон шодравон Фаррух Хоҷаев ва рӯнамоии китоб – каталоги ӯ бо номи «Муҳаббат ба ҳаёт» баргузор гардид. «Муҳаббат ба ҳаёт» - ро «Бунёди адабии Айнӣ» нашр кардааст, ки дар он  маҳсули эҷоди рассом гирд оварда шудааст. 

Ӯ дар шаҳри Душанбе, дар оилаи зиёӣ, ба дунё омада. Завқи санъати тасвирӣ ӯро ба коллеҷи ҷумҳуриявии рассомии ба номи Мирзораҳмат Олимов овард. Баъди хатми коллеҷ дар нашриёти «Ирфон» ҳамчун рассом фаъолият бурд.

Номбурда дар соҳаҳои графика, кулолӣ ва ҳайкалтарошӣ қувва озмуда, саҳмаш дар тарбияи шогирдон низ шоистаи офарин аст. Офаридаҳои ӯ  фалсафаву мазмунҳои бикри худро доранд.

- Асарҳои ин рассом дар осорхона ва нигористонҳои Тоҷикистон, Россия, Хитой, Аврупо ва давлатҳои Осиёи Миёна ба намоиш гузошта шудаанд. Ӯ соли 1997 дар биенналеи (фестивал, намоиш ва озмуни асарҳои рассомӣ) мамлакатҳои Осиёи Марказии шаҳри Тошканд ва соли 1999 дар озмуни ороиши китоб, ки аз тарафи Оғохон гузаронда шуд, ширкат варзида, сазовори ҷоизаҳо гардид. 

Ф. Хоҷаев дар солҳои вазнини ҷанги шаҳрвандӣ низ аз ҳунари хеш ва рассомон дифоъ карда, нагузошт, ки оташи ин навъи санъати нафиса дар Меҳани мо хомӯш бошад, - гуфт Ҷамшед Ғанизода, ректори донишкада.

Ӯ солҳо дар коллеҷи ҷумҳуриявии рассомӣ аз фанни графика дарс гуфт. Аз соли 2012 то соли 2017 раиси Иттифоқи рассомони Тоҷикистон ҳам буд.

Тавре Наргис Ҳамидова, раиси Иттифоқи рассомони Тоҷикистон, иброз дошт: «Фаъолияти Фаррух Хоҷаев ҳамчун раиси ин созмони ҳунарӣ ба даврае рост омад, ки он аслан аз фаъолият бозмонда, мутахассисони соҳа пароканда буданд. Ӯ дар як муддати кӯтоҳ фаъолияти Иттифоқи рассомонро ҷон бахшид. Исми ӯ дар кишвари мо ҳамчун поягузори графика маълуму машҳур аст».

Соли 2018 мусаввараҳои ӯ дар Қатар ба намоиш гузошта шуда, баҳои баланд гирифтанд. Бори охир моҳи марти соли 2020 намунаи осораш дар намоиши “TOUR PORTRET” - и Ҷумҳурии Халқии Хитой ба намоиш гузошта шуда, баҳои баланди мухлисону мутахассисонро сазовор гардид.

Намоиши «Муҳаббат ба ҳаёт» дар Донишкадаи давлатии санъати тасвирӣ ва дизайн то 25 январ ва, баъдан, то 1 феврал дар меҳмонхонаи «Душанбе – Серена» идома меёбад.

 

Бузургмеҳри БАҲОДУР,

 «Ҷумҳурият»