То моҳи майи соли ҷорӣ дар шаҳри Душанбе 5 нуқтаи иловагии муайянкунандаи вазъи ифлосшавии ҳавои атмосфера ба кор шурӯъ мекунад. Нуқтаҳои санҷишӣ, асосан, дар ҷойҳои сарборӣ аз воситаҳои нақлиёт - боғи фарҳангӣ - фароғатии ба номи Садриддин Айнӣ, кӯчаҳои Калинин, Саъдӣ Шерозӣ, наздикии Иттиҳодияи истеҳсолии нассоҷии «Тоҷиктекстил» ва кӯчаи Неъмат Қарабоев, шафати бозорҳои «Деҳқон» ва «Саховат», инчунин, дар қисмати шарқӣ миёни маҳаллаҳои километрҳои 7-ум ва 9-уми пойтахт бунёд мешаванд.

Ҳар кадом аз нуқтаҳои санҷишӣ бо технологияи муосир муҷаҳҳаз гардида, ба мутахассисон имконият фароҳам меорад, то ин ки ҳолати ифлосшавии ҳавои шаҳрро пурра таҳти назорат гиранд. Бо ин мақсад аз ҷониби мутахассисони соҳа пайваста мониторинг гузаронда мешавад.

Баҳодур Шерализода, раиси Кумитаи ҳифзи муҳити зисти назди Ҳукумати Ҷумҳурии Тоҷикистон, дар ин самт фаъолияти мутахассисони Агентии обуҳавошиносиро махсус таъкид дошт, ки онҳо дар баробари пешниҳоди саривақтии маълумот оид ба вазъи боду ҳаво, пасту баландшавии сатҳи оби кӯлу дарёҳо, ҳамчунин, ҳолати заҳролуд гаштани ҳавои шаҳрро месанҷанд.

- Айни замон вазъи ҳавои атмосфера дар пойтахти кишвар муътадил аст. Яъне ҷараёни партофти газҳо ба ҳаво ва муҳити зист ба андозаи меъёрҳои муқарраргардида мебошад, - гуфт раиси кумита.

Тавре маълум аст, партофт ба ҳавои атмосфера ва муҳити зист дар бисёр маврид ба фаъолияти воситаҳои нақлиёт ва баъзе корхонаҳои саноатӣ рабт дорад. Аммо ин ҷо ҳолати ғайриқонунӣ сӯзондани барги дарахтон, афзоиши партов ва риоя нагардидани қоидаи обпошӣ дар вақти сохтмони биноҳо, ки чангу ғубор бармехезад, низ таъсиргузор аст.

- Кумитаи ҳифзи муҳити зист оид ба пешгирии ғайриқонунӣ сӯзондани хазонҳо борҳо ба раисони шаҳру ноҳияҳои мамлакат барқия ирсол намуд, вале ин амал такроран аз ҷониби сокинон ва нозирони минтақавӣ сурат мегирад.  Вобаста ба коркарди партов, махсусан маводи пластикӣ гуфтан зарур аст, ки нахуст бояд масъалаи ба гурӯҳҳо ҷудо гардидани партов ҳалли худро ёбад. Ширкатҳои хориҷӣ низ дар масъалаи мазкур ҳавасманданд. Вале, бисёр хуб мешавад, агар коркарди партов, ки даромади хуб дорад, аз ҷониби соҳибкорони ватанӣ анҷом дода шавад. Аз ин рӯ, масъалаи мазкур дар баррасии Ҳукумати мамлакат қарор дорад, - иброз дошт Саидусмон Судуров, сардори шуъбаи назорати давлатии истифода ва ҳифзи ҳавои атмосфераи кумита.    

Бо рушди инноватсия ва технология раванди таъсиррасонӣ ба ҳавои атмосфера хоҳу нохоҳ бештар мегардад. Барои ин аз ҳозир (дар давраи татбиқи ҳадафи чоруми стратегӣ) фаъолияти бисёр муассисаю идораҳо ба марҳилаи нави рушд мутобиқ гардонда мешаванд, ба монанди Агентии обуҳавошиносӣ, ки барои роҳ надодани партофти аз меъёр зиёди газҳо пайваста ҳолати ҳавои шаҳр ва ҷумҳуриро месанҷад. Бо ин мақсад, ғайр аз шаҳри Душанбе дар дигар минтақаҳои кишвар, дар маҷмӯъ, 16 нуқтаи санҷиши ҳавои атмосфера ташкил мешавад, ки аз ин 1 - тоаш дар назди худи бинои агентӣ насб мегардад, баъди ҳар даҳ дақиқа оид ба вазъи ифлосшавии ҳавои пойтахт ва кишвар маълумот медиҳад. 

 

Оҳистамоҳ ВАФОБЕК, 

«Ҷумҳурият»