Пешвои миллат муҳтарам Эмомалӣ Раҳмон чун як сиёсатмадори аз гузашта огаҳ имрӯз ба он талош доранд, ки давлатро бо фарҳангу забони устувори миллӣ ба ояндагон мерос гузоранд.

Забон меҳвари ваҳдати миллат аст ва он ба ҳар миллат истиқлол, марз ва ҳувият мебахшад. Бо таъкиди Пешвои миллат забон ёдгории маънавӣ ва рамзи ҳамбастагиву иттиҳоди миллат мебошад. Аз ин ҷиҳат, яке аз шоҳсутунҳои муқаддасоти миллӣ имрӯз забони мо ба ҳисоб меравад. Мазмуни суханони Пешвои миллатро дар андарзу таъбирҳои бузургтарин шахсиятҳои ҷаҳонӣ пайдо кардан мумкин аст, ки нисбат ба забони модарӣ баён доштаанд. Пешвои миллат, нахуст чун як фарди фарҳангӣ ба забони модарии худ арҷ мегузоранд ва онро забони шевою шоирона медонанд. 

Ёдамон ҳаст, ки бо тасмими Сарвари давлат соли 2008 - Соли забони тоҷикӣ эълон шуд. Мақому корбасти забони модарӣ дар тамоми шохаҳову доираҳои иқтисодӣ ва иҷтимоиву коргузорӣ баланд гашт. Қонуни нави забон дар замони истиқлол дар мувофиқат ба меъёрҳои байналмилалӣ ва эҳтирому муносибати хос ба дигар забонҳо таҳияву пазируфта шуд. Бо пешниҳоди Президенти кишвар Кумитаи забон ва истилоҳоти назди Ҳукумати Ҷумҳурии Тоҷикистон таъсис ёфт. Ин ниҳод бо назардошти равандҳои мураккаби ҷаҳонишавӣ манфиати забони тоҷикиро ҳимоя мекунад. 

Пайдост, ки таҳоҷуми фарҳангӣ ва фарҳангҳои ноаён таҳмилшаванда нахуст ба пояи забону фарҳанг зарба мезананд. Дар ин ҷараёнҳои мураккаб сипару ҷавшани қавиеро барои забону фарҳанг дорем, ки забон аст. Ба ин манзур, ниҳодҳои дахлдор муваззаф гардидаанд, ки вазъи истилоҳот ва шаклгирии онҳоро дар тамоми соҳаҳо ба назорат гиранд.

Ба таври бесобиқа ворид гардидани истилоҳоти бегона яке аз омилҳои асосии костагии забон мебошад. Дар ҳошияи ин раванд Президенти мамлакат муҳтарам Эмомалӣ Раҳмон таъкид кардаанд, ки бояд компютеркунонии забони тоҷикӣ ба роҳ монда шавад. Ин ибтикор, ки хеле суст амалӣ мешавад, барои ҳамоҳангии фазои иҷтимоии интернет бо мардум мусоидат мекунад. Махсусан, забони тозаву намунавии ВАО-ро омили асосии рушди забон меҳисобанд, ки ин нуқтаро устод Айнӣ ҳам дар мисоли чанд нашрия дар замони худ таъкид дошта буданд.  

Ин ҳама даъват ва иршоди Сарвари давлат ба масъулият дар роҳи ҳифзу эҳтироми забон аст. Феълан забони модариро кишварҳои абарқудрат асоси амнияти худ медонанд ва тавассути он ба тарғиби фарҳангу тамаддуни худ машғуланд. Ин амал моро ҳушдор медиҳад, ки раҳнамоиҳои Пешвои миллатро сармашқи кори худ қарор дода, сипари милливу фарҳангии худ – забони тоҷикиро аз камрангӣ, харобӣ ва камистеъмолӣ эмин нигаҳ дорем.

 

Савринисо СОЛЕҲОВА,

омӯзгор – мураббии муассисаи давлатии томактабии № 157 ноҳияи Сино