Хуруҷи дубораи бемории коронавирус дар мамолики Аврупову Амрико ҳушдор медиҳад, ки хатари паҳншавии он ба дигар кишварҳои ҷаҳон, аз ҷумла Тоҷикистон, ҳанӯз аз байн нарафтааст. Бинобар ин,  ниҳодҳои дахлдори кишвар дар ин самт пайваста тадбирҳои зарурӣ меандешанд. Дар марҳилаи ҳозира, ки ҳолатҳои гирифторӣ ба COVID – 19 дар кишвар хеле коҳиш ёфтааст, ситодҳо оид ба пешгирии паҳншавӣ ва интиқоли коронавирус ҷиҳати беҳтар омода намудани муассисаҳои табобатӣ ба муолиҷаи беморон, ба миқдори зарурӣ захира намудани доруворӣ, беҳтар  намудани вазъи таъминот бо таҷҳизотҳои  тиббии ташхис ва табобат кор мебаранд. 

 

Ба ин мақсад, муовини раиси ВМКБ, роҳбари ситоди вилоятӣ оид ба пешгирии бемории сироятии коронавирус Назира Амирбекзода аз анборхонаи махсуси нигаҳдории доруворӣ дидан намуд. Зимни боздид аз муассисаҳои табобатии шаҳри Хоруғ, муовини сардори раёсати тандурустӣ ва ҳифзи иҷтимоии аҳолии вилоят Нуралӣ Додалиев иттилоъ дод, ки соли сипаригашта дар вилоят 29 ҳодисаи фавт аз касалии COVID – 19  ба қайд гирифта шуд. Хушбахтона, аз 27 декабри соли гузашта то ба имрӯз сироятёбӣ аз ин беморӣ сабт нагардидааст. 

Санҷиш нишон дод, ки дар анбор ба миқдори зарурӣ маводи пешгирикунанда, муҳофизатӣ ва 57 намуди доруворӣ аз касалии илтиҳоби шуш захира гаштаанд. Муҳлати истифодабарии онҳо то солҳои 2022 – 2023 мебошад. Нуралӣ Додалиев зикр кард, ки ин доруҳо аз ҷониби Вазорати тандурустии ҷумҳурӣ, шарикони рушд, аз қабили Хадамоти тандурустии Оғохон ва Агентии Оғохон оид ба макони зист, дигар ташкилот ва шахсони хайрхоҳ дастрас шуда, барои табобати беш аз 5 ҳазор бемор пешбинӣ мешавад. Доруворӣ барои беморон ройгон аст . 

Дар баробари ин, аксари ноҳияҳои вилоят таҷҳизотҳои рентгении рақамӣ дошта, рӯзҳои наздик ба касалхонаи вилоятӣ томографияи магнитӣ-резонансӣ (МРТ) оварда мешавад. Ин таҷҳизот агар аз як ҷиҳат шароити беҳтари аниқ намудани бемориро муҳайё месозад, аз ҷониби дигар сарсонӣ ва сарфиёти зиёдатиро аз байн мебарад. Зеро то ҳол ниёзмандон аз шаҳру навоҳии вилоят барои ташхис дар дастгоҳи МРТ ба пойтахти кишвар  мерафтанд. 

- Баҳри муборизаи муассир бо касалӣ  ситоди вилоятӣ оид ба пешгирии бемории сироятии COVID – 19  ва шӯрои ҳамоҳангсозии фаъолияти соҳаи тандурустии вилоят шабонарӯз талош доранд. Хушбахтона, дар вилоят ҳодисаи сироятёбии табибон ва дигар кормандони соҳаи тандурустӣ, фавти онҳо рӯзҳои охир аз ин касалӣ ба қайд гирифта нашудааст. Мақомоти иҷроияи ҳокимияти давлатии вилоят дар доираи дастуру супоришҳои  Пешвои миллат кормандони соҳаро, ки бо беморони коронавирус сарукор доранд, бо маблағҳои иловагӣ қадр менамояд, - зикр кард  муовини  раиси  вилоят Назира Амирбекзода.

 

Раҳмони ГУЛЗОР, “Ҷумҳурият”