Ироаи Паёми Сарвари давлат имсол барои мардуми мо беш аз ҳарвақта аз аҳамияти хос бархӯрдор мебошад. Зеро мо дар остонаи таҷлили Ҷашни бошукӯҳ ва муқаддаси 30 - солагии Истиқлолияти давлатии Ҷумҳурии Тоҷикистон қарор дорем ва омодагиҳои ҳамаҷониба ба истиқболи ин санаи фархунда бомаром идома доранд. Тавре Пешвои муаззами миллат дар оғози Паём зикр карданд, соли гузашта дар саросари кишвар 18300 иншооти истеҳсолӣ, иҷтимоӣ ва фарҳангии банақшагирифташуда, ки бештари онҳо иншооти соҳаҳои маориф, тандурустӣ ва варзиш мебошанд, бунёд ва ба истифода дода шуданд. Ин рақам баёнгари он аст, ки рушди илму фарҳанг ва таъмини саломатии ҷомеа омили аслии таҳкими истиқлол ва ҳадафи роҳбарияти олии давлат аст.

Дар Паёми навбатӣ  Президенти Ҷумҳурии Тоҷикистон муҳтарам Эмомалӣ Раҳмон бори дигар оид ба зуҳуроти номатлуб ва хатари терроризму экстремизм, ифротгароӣ, гаравидани ҷавонон ба ҳизбу гурӯҳҳои мамнӯъ изҳори ақида намуда, таъкид карданд, ки барои ҳимояи марзу бум, ҳифзи суботу оромӣ ҳар як фарди ватанпарвар бояд ҳушёр бошад. Зеро бе суботу оромӣ ягон ҷомеаи ҷаҳон рушд намеёбад ва номи худро ба нестӣ рақам мезанад.

Сол ба сол намояндагони ин гурӯҳу равияҳо дар тамоми ҷаҳон мекӯшанд ҷавононро таҳти таъсири худ қарор диҳанд, вазъи кишварҳоро ноором ва фарҳангу мазҳаби худро иҷборан ба сари халқҳои дигар бор созанд. Бинобар ин, роҳбарони вазорату сохторҳои низомӣ ва мақомоти ҳифзи ҳуқуқ вазифадор шуданд, ки ҷиҳати муҳайё кардани шароити мусоиди хизмат ва зиндагӣ, мунтазам баланд бардоштани сатҳи касбияти афсарон, омодабошии ҷангӣ, омӯзиши касбии хизматчиёни ҳарбӣ, тарбияи онҳо дар рӯҳияи садоқат ба Ватан, риояи қатъии интизоми хизматӣ, талаботи ойинномаҳои ҳарбӣ, мубориза бо ҳама гуна ҳуқуқвайронкуниҳо, махсусан кирдорҳои коррупсионӣ ва интихобу ҷобаҷогузории дурусти кадрҳо, чораҳои таъхирнопазир андешанд. Зеро вазифаи аз ҳама муҳим – ҳимояи марзу бум, таъмини амнияти давлату миллат ва ҳифзи суботу оромии ҷомеа, пешгирӣ ва бартараф кардани ҳама гуна таҳдиду хатарҳои берунӣ, таъмини волоияти қонун ва тартиботи ҷамъиятӣ ба ҳисоб меравад.

Президенти мо, ки худ аз миёни мардум баромадаанд ва аз мушкилоташон огоҳанд, дар паҳлуи халқ буданро рисолати аслии роҳбарии худ медонанд. Бинобар ин, аз Роҳбари давлат сар карда, то вакилони мардум, аъзои Ҳукумат, роҳбарони ҳамаи сохтору мақомоти давлатӣ ва тамоми хизматчиёни давлатӣ – содиқона хизмат кардан ба халқи Тоҷикистонро вазифаи асосии ҳар як масъули давлатӣ медонанд.

Итминони комил дорем, ки дар партави сиёсати созанда ва дурандешонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳар яки мо дар фазои иттиҳоду сарҷамъӣ ва сулҳу салоҳ барои ҳифзи истиқлоли миллӣ бо саъю талош ва кӯшишу ғайрат ва заҳмати фидокорона саҳми сазовори хешро мегузорем. Дар ин замина, мо кормандони мақомоти прокуратура низ аз Паёми навбатии Пешвои муаззами миллат муҳтарам Эмомалӣ Раҳмон ба Маҷлиси Олӣ рӯҳу илҳоми тоза гирифта, кӯшиш ба харҷ медиҳем, ки аз имкониятҳои мавҷуда самаранок истифода бурда, нуктаҳои дар ин ҳуҷҷати муҳим баёнгаштаро дар амал ҷорӣ намоем ва бад-ин васила дар пешравию шукуфоии Тоҷикистони маҳбубамон саҳм гузорем.

 

Шаҳбоз ТОҲИРЗОДА,

прокурори ҳарбии гарнизони Хоруғ