Ҳамзамон, бо иштироки Сарвари давлат ва раиси шаҳри Душанбе дар маъракаи ниҳолшинонӣ дар як гӯшаи боғи майдони “Истиқлол” даҳҳо ниҳоли дарахти секвойяи калифорниягӣ шинонда шуд.

Мавриди зикри хос аст, ки Пешвои муаззами миллат муҳтарам Эмомалӣ Раҳмон, шахсан, дарахтони секвойяи калифорниягиро бист сол қабл аз хориҷи кишвар оварда, дар боғи Қасри миллат парвариш карданд. Имрӯз 36 дарахти секвойяи калифорниягӣ, ки нодир асту то 3000 сол умр мебинад, ду  тарафи  даромадгоҳи боғи майдони “Истиқлол” - ро оро медиҳад.

Бояд гуфт, ки баъди ба истифода додани майдони “Истиқлол”, он макони асосию марказии пойтахт мегардад, зеро дар ин ҷо рамзи истиқлолу озодӣ, ки хоҳишу талоши миллати сарбаланди тоҷик аст, гузошта мешавад. То имрӯз дар гӯшаҳои алоҳидаи боғ 1045 ниҳоли нодири ороишӣ парвариш меёбад. Тибқи нақша, аз масоҳати умумии майдон, ки 30 гектарро ташкил медиҳад, 11 ҳазор метри мураббааш сабзкорӣ мешавад. Оянда дар боғи майдони “Истиқлол”, инчунин, дарахтони нодири сояафкану ороишии кишварҳои аврупоии ба минтақа мутобиқ шинонда хоҳанд шуд.

Президенти кишвар муҳтарам Эмомалӣ Раҳмон ба боғдорон барои бо тарҳи зебо мураттаб сохтани гулгаштҳои боғ ҳидоят доданд.

Сарвари давлат муҳтарам Эмомалӣ Раҳмон ва раиси шаҳри Душанбе Рустами Эмомалӣ, ҳамчунин, бо рафти корҳои сохтмонӣ ва лоиҳаи майдони “Истиқлол” шинос гаштанд. Бунёди майдони “Истиқлол” бахшида ба 30-солагии Истиқлолияти давлатии Ҷумҳурии Тоҷикистон таҳти назорати доимии Президенти мамлакат қарор дорад. Зимни шиносоӣ бо ҷараёни сохтмон, Пешвои миллат муҳтарам Эмомалӣ Раҳмон таваҷҷуҳи роҳбарияти мақомоти иҷроияи ҳокимияти давлатии шаҳри Душанберо ба сифатнокӣ ва муҳлати иҷрои корҳо ва вусъат бахшидани дигар тадбирҳои ободонӣ ҷалб карданд.