Раиси Кумитаи давлатии амнияти миллӣ Саймумин  Ятимов ҳайати баландпояи хадамотҳои марзбонӣ ва кор бо муҳоҷирони Иттиҳоди Аврупо – Анджей Якубшек, директори раёсати кор бо шаҳрвандони хориҷии мақомоти марзбонии Полша, Лоте Лавиня ван дер Маде, мудири бахш оид ба бозпасгардонӣ ва Эдита Скибинска, масъули аршади тамос оид ба бозпасгардониро ба ҳузур пазируфт.

 

Қобили зикр аст, ки, ахиран, дар Иттиҳоди Аврупо зерсохтори алоҳида барои бозпасгардонии муҳоҷирон бо таъйини намояндаи махсус дар Осиёи Марказӣ таъсис ёфт.

Ҷонибҳо масъалаҳои суръат бахшидан ба раванди бозпасгардонии шаҳрвандони тоҷик ба Ватан, ки дар давлатҳои Аврупо ғайриқонунӣ сукунат дошта, хатари муайянро барои ҷомеаи аврупоӣ эҷод менамоянд, мавриди баррасӣ қарор доданд.

Саймумин Ятимов таваҷҷуҳи ҳайатро ба фаъолияти тахрибии ТТЭ собиқ ҲНИ ҷалб намуда, таъкид сохт, ки баъзе шаҳрвандони Тоҷикистон зери шиорҳои дурӯғин ва бо ҳуҷҷатҳои қалбакӣ дар кишварҳои аврупоӣ соҳиби мақоми паноҳандагӣ шуданианд.

Ба шарикон маълумоти муфассал ва далелҳои ҳуҷҷатӣ оид ба ҷиноятҳои содиркарда ва амали тахрибии баъзе фаъолони ТТЭ собиқ ҲНИ, ки, ҳамзамон,  ба содир намудани  хиёнат ба Ватан дар пайи гирифтани иҷозати иқомат дар кишварҳои ғарбӣ ҳастанд,  пешниҳод гардид. Сарчашмаҳои маблағгузорӣ, марказ ва воситаҳои роҳандозии фаъолияти ҷинояткоронаи  чунин ашхос бо далелҳои муътамад ба таваҷҷуҳи масъулони Полша ва Иттиҳоди Аврупо  расонда шуд.

Ҷонибҳо ба мувофиқа расиданд, ки ҳамкории муштаракро дар самти ошкор, дастгир ва ба Тоҷикистон истирдод намудани ҷинояткорон, инчунин, пешгирии воридшавии ғайриқонунӣ ба Аврупо тавсеа мебахшанд.  “Харитаи роҳ” дар ин масъала таҳия ва шахсони масъул муайян гаштанд.

Ҳайати меҳмонон, ҳамчунин, аз ҷониби роҳбарияти вазоратҳои корҳои хориҷӣ, дохилӣ, меҳнат, муҳоҷират ва шуғли аҳолӣ низ пазируфта шуда, масъалаҳои ҳамкорӣ бо ниҳодҳои номбурда мавриди баррасӣ қарор гирифтанд.

АМИТ «Ховар»