Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон дар Паём таъкид кардаанд: «Арҷ гузоштан ба фарҳангу таърихи бостонии миллат ва омӯхтани он вазифаи ҳар як соҳибватан мебошад». 

Даврон Нуриддинов аз Норак бо волидонаш ба водии Вахш, ки дар гузашта туғайзор буд, кӯч баст. Дар деҳаи Заргари ноҳияи Коммунистӣ (ҳозира Кӯшониён) сукунат гирифтанд. Пас аз хатми омӯзишгоҳи педагогии шаҳри Қӯрғонтеппа (ҳоло Бохтар) фаъолияти омӯзгориашро дар деҳа оғоз намуд. 

Даврон, ки шахси баору номус буд, ихтиёрӣ ба комиссариати ҳарбии ноҳия рафт ва гуфт, ки бо бародарам Сафарбек якҷо моро ба фронт ба ҷанги зидди  фашистон фиристонед ва ҳамин тавр ҳам шуд. Дар муҳорибаҳои Сталинград, Брянск, Прибалтика ва Шарқи Дур бар зидди истилогарони немису милитаристони Ҷопон ҷангид.  

Ӯ бо чандин ордену медалҳо ва Сипосномаи Сталин пас аз ғалаба, яъне соли 1946 ба деҳоти Заргар баргашт. Дар вазифаҳои мудири шуъбаи маориф ва муовини раиси шаҳри Қӯрғонтеппа кор кард. Охирҳои солҳои панҷоҳуми асри XX аз нав муттаҳидшавии хоҷагиҳо ба вуқӯъ пайваст ва ин марди асилро, ки таҷрибаи бою ғанӣ андӯхта буд, раиси колхози ба номи Максим Горкий интихоб намуданд. 

Бо ташаббуси ин марди нексиришту фурӯтан дар ҳудуди хоҷагӣ заводи пахта муҷаҳҳаз бо технологияи пешрафта ба истифода дода шуд, дар як сол бештар аз 25 ҳазор тонна пахтаро коркард менамуд. Дар ҳамон вақт сифати нахи пахтаи заводи онҳо дар биржаи Лондон сазовори ҷойи дуюм гардида буд. Сипас, ӯ дар хоҷагӣ заводи истеҳсоли хишти пухтаро ба роҳ монд. Бештар аз 100 нафар соҳиби ҷойи кор гашт. Ба зиёда аз 2 ҳазор оила  хона сохт.

Он қасрҳои муҳташами фарҳангӣ ва мактабу беморхонаҳо, иншооти иҷтимоию маишие, ки имрӯз симои деҳоти Заргарро зеб мебахшанд, аз даврони Даврон Нуриддинов маҳсуб меёбанд. Солиёни зиёд вакили Шӯрои Олӣ буд.

Фарзанди ӯ Давлатбек, ки хатмкардаи Донишгоҳи шаҳри Лвови Украина мебошад, мегӯяд, ки падарам ба рушди боғу токпарварӣ ва бунёди гармхонаҳои ситруспарварӣ аҳамияти хоса медод. Натиҷаи ҳамин буд, ки то ҳол сокинони деҳаи Заргар аз ҳосили онҳо ком ширин менамоянд.

Тирамоҳи соли 1987 ин марди наҷиб дунёро падруд гуфт.

Кору пайкори родмарди ду ҷабҳа пур аз корномаҳосту рӯзгораш ибрат барои зиндагии шоистаи ҷавонон.

Дар солҳои соҳибистиқлолӣ ба шарофати рӯи кор омадани ташаббусҳои созандаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон симои деҳоти Заргар шукӯҳу шаҳомати тоза  гирифт ва месазад, ки имрӯз мақомоти марбута баҳри абадигардонии хотираи неки Даврон Нуриддинов, ки яке аз аввалин бунёдгарони деҳоти Заргар ба ҳисоб меравад, ҷамоатро ба номи ӯ гузоранд.

Шоир барҳақ фармудааст:

Зиндаю ҷовид монд ҳар кӣ 

накуном зист,

К-аз ақибаш зикри хайр зинда 

кунад номро.

 

Музаффар МУРОДОВ,

бойгоншиноси дастгоҳи раиси вилояти Хатлон