Дар Бонки миллии Тоҷикистон бо роҳбарии раиси муассиса Ҳоким Холиқзода бо мақсади омӯзиш ва иҷрои дастуру супоришҳои Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» бо иштироки роҳбарият, сардорони воҳидҳои сохторӣ ва кормандон ҷаласа доир гардид. 

Ҳоким Холиқзода зикр кард, ки Паёми Пешвои миллат ба Маҷлиси Олии Ҷумҳурии Тоҷикистон, ки самтҳои асосии сиёсати дохилӣ ва хориҷии кишварро муайян менамояд, пеш аз ҳама, ба сифати раҳнамои мардуми Тоҷикистон дар соли 2021 – соли таҷлили 30-солагии Истиқлолияти давлатии Ҷумҳурии Тоҷикистон хидмат хоҳад кард. 

- Пешвои миллат дар Паём дар баробари бахшҳои муҳими кишвар, низоми бонкиро мавриди таҳлили амиқ қарор дода, дар радифи дастовардҳои соҳа ҳарчи зудтар ҳаллу фасл кардани як қатор масъалаҳоро таъкид намуданд. Аз ҷумла, зиёд кардани ҳаҷми қарздиҳӣ ба соҳаҳои иқтисоди миллӣ, низоми фаъоли идоракунии корпоративӣ, кам кардани хавфҳои амалиётӣ ва қарзӣ, коҳиш додани қарзҳои ғайрифаъол, афзоиши ҷалби сармоя ба низоми бонкӣ ва таъсиси намояндагии бонкҳои хориҷӣ ҷиҳати пайдо намудани манбаъҳои иловагӣ барои ҷалби сармоягузории дохилӣ ва хориҷӣ, беҳтар намудани маблағгузорӣ ба соҳаҳои истеҳсолӣ аз масъалаҳое буданд, ки Президенти кишвар ба онҳо таваҷҷуҳи махсус зоҳир сохтанд, - иброз дошт раиси БМТ Ҳоким Холиқзода. 

Ҷиҳати иҷрои саривақтӣ ва ҳамаҷонибаи дастуру супоришҳои Пешвои миллат Бонки миллии Тоҷикистон нақшаи чорабиниҳои Бонки миллии Тоҷикистон оид ба иҷрои вазифаҳое, ки дар Паём омадаву мавриди таваҷҷуҳи махсус қарор гирифтаанд, таҳия намудааст. 

Ҳоким Холиқзода тазаккур дод, ки нақшаи мазкур аз 14 банд иборат буда, дар он иҷрои дастуру супоришҳои Пешвои миллат ба назар гирифта шудаанд. Аз ҷумла, бартараф намудани камбудиҳо дар самти ҳаҷми қарздиҳӣ ба соҳаҳои иқтисоди миллӣ, идоракунии корпоративӣ, хавфҳои амалиётӣ ва қарзӣ, қарзҳои ғайрифаъол, ҷалби сармоя ба низоми бонкӣ ва таъсиси намояндагии бонкҳои хориҷӣ, ба талабот мутобиқ кардани санадҳои меъёрии ҳуқуқии дахлдор, таъмин намудани раванди идоракунии корпоративӣ дар ташкилотҳои қарзии молиявӣ ва тадриҷан афзоиш додани сармояи оинномавии бонкҳо, зиёд кардани пешниҳоди қарзҳои дарозмуддат ба соҳибкорони истеҳсолӣ ва фаъол намудани низоми рейтинги миллӣ барои ташкилотҳои қарзӣ ва ширкатҳои суғуртавӣ, бо роҳандозии технологияҳои молиявию инноватсионӣ васеъ намудани хизматрасониҳои бонкӣ ва дар ин замина, пурра ҷорӣ кардани амалиёти ғайринақдӣ, аз ҷумла аз байн бурдани омилҳои инсонӣ ҳангоми ҳисоббаробаркуниҳои пулӣ бо аҳолӣ масъалаҳое мебошанд, ки барои ҳалли ҳарчи зудтари онҳо афзалият дода шудааст. 

Дар баробари ин, нақшаи омоданамудаи Бонки миллии Тоҷикистон таҳия ва ба Ҳукумати мамлакат пешниҳод намудани лоиҳаи санадҳои меъёрии ҳуқуқӣ оид ба гузарондани авф вобаста ба қонунигардонии маблағҳо ва дигар дороиҳои шаҳрвандон, пешниҳод намудани маълумоти зарурӣ оид ба таҳияи лоиҳаи Кодекси андоз дар таҳрири нав бо дарназардошти хусусияти самти фаъолияти низоми бонкӣ, ҷудо кардани қарзу грантҳо ба занон ва оилаҳо, дастгирии ташаббусҳои бонувон ва ҷалби бештари онҳо ба вазифаҳои роҳбарикунанда ва дигар масъалаҳои муҳими дар Паёми Пешвои миллат зикргардидаро фаро гирифтааст. 

Ҳоким Холиқзода бори дигар таъкид сохт, ки роҳбарият ва тамоми кормандони низоми бонкии кишвар барои иҷрои пурра ва саривақтии дастуру супоришҳои Пешвои миллат ҳамаи имкониятҳо ва зарфиятҳои худро сарф карда, кӯшиш менамоянд, то боварии Сарвари давлатро сазовор бошанд. 

Дар анҷом раиси Бонки миллии Тоҷикистон Ҳоким Холиқзода таъкид намуд, ки Паёми Пешвои миллат ба Маҷлиси Олӣ дастури раҳнамоест, ки моро ба муттаҳидӣ ва саъю кӯшиши пайваста ба хотири амалисозии он даъват мекунад ва дар амал татбиқ шудани муқаррароти Паём ба пешрафту дастовардҳои назарраси кишвари мо дар ҳамаи соҳаҳо, аз ҷумла низоми бонкии мамлакат дар соли таҷлили Ҷашни фархундаи 30 - солагии Истиқлолияти давлатии Ҷумҳурии Тоҷикистон мусоидат менамояд. 

 

Муҳаммадзоиршо 

ШАРИФЗОДА,«Ҷумҳурият»